BAKI, AzerVoice, Səməd Əyyubov

ABŞ Prezidenti Donald Tramp, Belarus Prezidenti Aleksandr Lukaşenko ilə Rusiya Prezidenti Vladimir Putinlə keçirəcəyi qarşıdakı sammit barədə müzakirələr apardığını bildirib.

AzerVoice-un məlumatına görə, Tramp bu barədə “Truth social" platformasında yazıb.

“Belarusun yüksək dəyər verdiyim prezidenti Aleksandr Lukaşenko ilə çox yaxşı bir söhbət apardım. Prezident Putinin Alyaskaya səfəri də daxil olmaqla bir sıra mövzuları müzakirə etdik” – deyə, Tramp qeyd edib.

Bundan əlavə, o, Lukaşenko ilə gələcək əməkdaşlıq imkanları və qarşılıqlı maraq doğuran məsələlər barədə fikir mübadiləsi aparmaq arzusunu ifadə edib.

“Gələcəkdə Prezident Lukaşenko ilə görüşmək imkanını səbirsizliklə gözləyirəm” – deyə, o vurğulayıb.

Xatırladaq ki, Tramp daha əvvəl avqustun 15-də Putinlə Alyaskada görüşəcəyini açıqlamışdı. Rusiya prezidentinin köməkçisi Yuri Uşakov da bu planı təsdiqləyərək, görüşün əsas mövzusunun Ukrayna münaqişəsinin uzunmüddətli sülh yolu ilə həlli variantları olacağını bildirmişdi.