BAKI, AzerVoice, Zeynəb Raminqızı
Kaliforniyada baş verən meşə yanğını geniş əraziyə yayılıb.
AzerVoice xəbər verir ki, bu barədə Kaliforniya Yanğın Mühafizə Xidmətinin məlumat verib.
ABŞ-ın Kaliforniya ştatında yerləşən Los Padres Milli Meşəsində avqustun 3-də başlayan meşə yanğını sürətlə yayılaraq nəzarətdən çıxıb. Yanğın indiyədək 12 min hektardan çox ərazini əhatə edib və hadisə yerindən təxminən 70 nəfər təxliyə olunub.
Yanğın çətin relyefli, sıldırım və enişli-yoxuşlu ərazilərdə alov cəbhələri yaradaraq söndürmə işlərini çətinləşdirir. Quru və isti hava şəraiti səbəbindən kənd və seyrək məskunlaşmış ərazilərdə alovun yayılma sürəti artıb.
Hadisə nəticəsində üç nəfər xəsarət alıb, lakin onların vəziyyəti barədə əlavə məlumat verilməyib. Yanğının hazırda yalnız 5%-nə nəzarət olunur, söndürmə işlərinə isə çoxsaylı canlı qüvvə və hava dəstəyi cəlb olunub.
Kaliforniya hakimiyyəti vəziyyəti yaxından izləyir və ehtiyac olduqda əlavə təxliyə tədbirlərinin görüləcəyini istisna etmir.
