BAKI, AzerVoice , Fərid Mikayılov

Rusiyanın Şərq bölgəsində yerləşən Kamçatka yarımadasında 6.2 bal gücüncə zəlzələ baş verib.

AzerVoice xəbər verir ki, bu barədə Rusiya Elmlər Akademiyası məlumat yayımlayıb.

Zəlzələnin episentri Petropavlovsk-Kamçatski şəhərindən 212 kilometr cənub-şərqdə, 23,6 kilometr dərinlikdə yerləşib.

Seysmoloqlar bu təkanı “güclü zəlzələ” kimi qiymətləndiriblər.

Petropavlovsk-Kamçatski şəhərində təkanlar 3 bal gücündə hiss olunub. İlkin məlumatlara əsasən, zəlzələ nəticəsində hər hansı dağıntı və ya insan tələfatı qeydə alınmayıb.

Mütəxəssislər bildiriblər ki, bu zəlzələ iyulun 30-da regionda baş vermiş 8,8 bal gücündə tarixi zəlzələnin ardınca gələn afterşoklardan biri ola bilər. Qeyd edək ki, həmin zəlzələ 1952-ci ildən bəri Kamçatkada müşahidə olunan ən güclü seysmik hadisə kimi yadda qalmış və Kuril adaları sahillərini dörd dəfə tsunami dalğaları vurmuşdu.

Hazırda bölgədə seysmik aktivlik davam edir. Rusiya Fövqəladə Hallar Nazirliyi əhalini ehtiyatlı olmağa və təlimatlara riayət etməyə çağırıb.