BAKI, AzerVoice , Fərid Mikayılov
ABŞ prezidenti Donald Tramp, ABŞ-la Pakistan arasında neft axtarışına dair yeni əməkdaşlıq razılaşmasının əldə olunduğunu açıqlayıb.
AzerVoice xəbər verir ki, Tramp bu barədə cümə günü özünün rəsmi sosial media hesabında məlumat verib.
“Biz Pakistanla razılaşma əldə etdik. Bu razılaşmaya əsasən, ABŞ Pakistanla birgə şəkildə geniş neft yataqlarının axtarışı üzrə fəaliyyət göstərəcək” – deyə Tramp bəyan edib.
Onun sözlərinə görə, bu çərçivədə ABŞ-ın aidiyyəti enerji şirkətləri prosesə cəlb olunacaq.
Tramp əlavə edib ki, Ağ Evin nümayəndələri hal-hazırda dünyanın bir sıra ölkələri ilə yeni ticarət və investisiya sazişləri üzrə danışıqlar aparır. Onun sözlərinə görə, yaxın günlərdə ABŞ və Avropa İttifaqı arasında imzalanmış yeni razılaşmaya əsasən, Avropa İttifaqı Birləşmiş Ştatlardan 750 milyard dollarlıq enerji resursları alacaq, əlavə olaraq 600 milyard dollarlıq investisiyalar həyata keçiriləcək.
Trampın açıqlamasında, həmçinin Cənubi Koreya ilə əldə olunmuş digər bir razılaşmaya da toxunulub. Həmin razılaşma çərçivəsində Seulun ABŞ iqtisadiyyatına 350 milyard dollara qədər sərmayə yatıracağı qeyd olunub.
