Bakı.AzerVoice
ABŞ prezidenti Donald Tramp Rusiya prezidenti Vladimir Putinə Ukrayna müharibəsinin dayandırılması üçün verdiyi vaxtı geri götürdüyünü açıqlayıb və vəziyyətdən məyus olduğunu bildirib.
AzerVoice xəbər verir ki, ABŞ prezidenti Donald Tramp Şotlandiyanın Turnberi şəhərində Böyük Britaniyanın baş naziri Keir Starmeri qəbul edərkən jurnalistlərə verdiyi açıqlamalarda Ukrayna və Qəzza mövzusuna toxunub.
Tramp bildirib ki, Rusiya-Ukrayna müharibəsinin sonlandırılması üçün daha əvvəl Putinə verdiyi 50 günlük müddəti artıq qısaldacaq.
O, həmçinin “Əgər mən prezident olmasaydım, bu gün dünyada altı fərqli müharibə olardı.”- deyə qeyd edib.
Trampın çıxışında Qəzzadakı vəziyyət də gündəmdə olub. ABŞ prezidenti bildirib ki, ötən həftə baş tutmayan atəşkəs və girov mübadiləsi danışıqlarından sonra İsrailin baş naziri Benyamin Netanyahu ilə telefon danışığı aparıb.
Tramp Netanyahuya müharibənin indi fərqli şəkildə aparılmalı olduğunu da açıq şəkildə ifadə etdiyini bildirib.