BAKI, AzerVoice
Son 24 saat ərzində İsrailin Qəzza zolağına endirdiyi hava zərbələri nəticəsində 70-dən çox fələstinli həlak olub.
AzerVoice xəbər verir ki, bu barədə Qətərin "Al Jazeera" telekanalı məlumat yayıb.
Məlumata görə, şənbə günü azı 71 nəfər öldürülüb. Onlardan 42-si humanitar yardım bölgüsünü gözləyən şəxslər olub. Eyni zamanda beş fələstinli aclıq səbəbindən həyatını itirib.
Bildirilib ki, dron hücumları nəticəsində öldürülənlər arasında Xan Yunis şəhərinin cənubunda yerləşən Əl-Məvasi bölgəsində çadırda gizlənən beş nəfər də var. İsrail hökuməti bu bölgəni “təhlükəsiz zona” elan etmiş və yüz minlərlə fələstinlini ora köçməyə məcbur etmişdi. Lakin vurğulanıb ki, İsrail ordusu bu “təhlükəsiz zonada” sığınacaq tapan insanlara qarşı mütəmadi şəkildə ölümcül hücumlar həyata keçirir.
Bundan əlavə, Qəzzanın mərkəzində yerləşən Deyr əl-Bəlah şəhərində də bir çadıra endirilən dron zərbəsi nəticəsində daha dörd fələstinli öldürülüb.
Qeyd edək ki, İsrailin 2023-cü il oktyabrın 7-dən bəri davam edən hücumları, intensiv bombardmanlar və blokada nəticəsində Qəzzada ağır humanitar fəlakət yaşanır. Beynəlxalq ictimaiyyətin və BMT-nin atəşkəs çağırışlarına baxmayaraq, vəziyyət pisləşməkdədir.
