BAKI, AzerVoice

Yəməndəki "Ənsar Allah" (husilər) hərəkatı, İsrailin cənubundakı bölgələrə və Ben Qurion Hava Limanına zərbələr endirib.

AzerVoice xəbər verir ki, bu barədə husilərin sözçüsü Yəhya Səri açıqlama verib.

"İsrailin cənubunda həssas bir hədəfə ballistik raketlə zərbə endirilib, Ben Qurion Hava Limanı da daxil olmaqla üç mühüm nöqtə pilotsuz uçuş aparatları ilə hədəf alınıb. Bu hücum İsrail ordusunun Qəzza zolağında fələstinlilərə qarşı həyata keçirdiyi soyqırım cinayətlərinə cavab olaraq edilib. Qəzzaya qarşı hücumlar dayandırılmayana qədər İsrailə qarşı hücumlar davam edəcək" - deyə, açıqlamada bildirilib.

İsrail ordusu isə Yəməndən atılan bu raketlərin hava hücumundan müdafiə (HHM) sistemi tərəfindən vurularaq zərərsizləşdirildiyini qeyd edib.

İsrail ordusunun bəyanatına görə, hücum zamanı Ölü dəniz yaxınlığındakı yaşayış məntəqələrində İordan çayının qərb sahilindəki yaşayış məntəqələrində hava hücumuna qarşı sirenlər səslənib. Hücumun husilər tərəfindən həyata keçirildiyi və raketin müdafiə sistemləri ilə qarşılandığı bildirilib.

Bundan əvvəl, husilər üç pilotsuz uçuş aparatı, “Fələstin-2” tipli hipersəs balistik raket və digər raketlərdən istifadə edərək İsrailin dörd şəhərinə hava hücumları həyata keçirmişdi.