BAKI, AzerVoice

Tailand Hərbi Hava Qüvvələri gün ərzində iki dəfə "F-16" və "JAS 39 Gripen" qırıcılarından istifadə edərək Kamboca Silahlı Qüvvələrinin sərhəd bölgələrindəki mövqelərinə hava zərbələri endirib.

AzerVoice xəbər verir ki, bu barədə “The Nation” qəzeti məlumat yayıb.

Məlumata görə, Tailand qırıcıları Kambocanın Surin vilayətində yerləşən Ta Kvai məbəd kompleksi ətrafındakı hərbi mövqelərini hədəfə alıb. Bununla yanaşı, Tailand Hərbi Hava Qüvvələri Kamboca Silahlı Qüvvələrinin artilleriya bölmələrinin yerləşdiyi Phu Makua və Ta Moen Tom məbəd komplekslərinin yaxınlığına bir sıra hava zərbələri endirib.

Nəşr yazır ki, tapşırıqları yerinə yetirdikdən sonra bütün qırıcılar təhlükəsiz şəkildə bazalarına qayıdıblar.

Qeyd edək ki, cənub-şərqi Asiyada yerləşən Tailand və Kamboca arasında uzun müddətdir ərazi mübahisəsi baş verir. Sərhəd razılaşmasının pozulması səbəbindən mayın 28-də bölgədə qısa müddətli qarşıdurma baş vermiş, hər iki ölkənin ordusu problemin dinc yolla həlli barədə razılığa gəlmişdi.

Tailand isə Kamboca ilə sərhəddəki bütün nəzarət məntəqələrinin Banqkok tərəfindən idarə olunacağını açıqlamışdı.

Təxminən iki ay sonra baş vermiş yeni qarşıdurmalarda Kambocada bir, Tailandda isə 14 nəfərin həlak olduğu bildirilib. Hər iki ölkə bölgədən minlərlə insanı təxliyə etdiyini bəyan edib.

Tərəflər ilk atəşi kimin açdığı barədə bir-birini günahlandırır.