BAKI, AzerVoice
İsrail ilə 12 gün davam edən müharibə zamanı yüksək rütbəli hərbi komandirlərin və nüvə alimlərinin öldürülməsi İran üçün ağır bir itkidir.
AzerVoice xəbər verir ki, bunu İranın Ali dini lideri Ayətullah Seyid Əli Xamenei deyib.
Bununla belə, o, İsrailin öz hədəflərinə çata bilmədiyini bildirib. Xamenei ilk dəfədir ki, bu müharibənin nəticələrini bu qədər açıq şəkildə şərh edib.
“Əlbəttə ki, Məhəmməd Baqeri (İran Silahlı Qüvvələrin Baş Qərargah rəisi), Hüseyn Səlami (SEPAH komandanı), Qulaməli Rəşid (Xatəm-ül Ənbiya Qərargahının rəisi), Əli Şadmani (birgə əməliyyatlar üzrə komandan müavini) və digər komandirlər, eləcə də Məhəmməd Mehdi Təhrançi, Fəridun Abbasi kimi nüvə alimlərinin itirilməsi hər bir xalq üçün böyük yüktür” - deyə, o bildirib.
“Lakin düşmən (İsrail - red.) hədəfinə çata bilmədi. Zaman göstərəcək ki, həm hərbi, həm də elmi sahələrdə irəliləyiş keçmişdən daha sürətli və geniş olacaq” - deyə, o əlavə edib.
Xamenei ölkənin təhlükəsizliyini və müstəqilliyini qorumaq üçün hərbi rəhbərlərin üzərinə daha böyük məsuliyyət düşdüyünü bildirib.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək rütbəli hərbçi, o cümlədən İran Silahlı Qüvvələrinin Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər həlak olub. İran BMT Təhlükəsizlik Şurasının hadisə ilə əlaqədar fövqəladə iclas çağırılmasını istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.