BAKI,AzerVoice

Fransa Xarici İşlər Nazirliyi İsrailin Qəzza zolağında humanitar yardıma çatmağa çalışan fələstinli mülki şəxslərə qarşı həyata keçirdiyi hücumları qınayıb.

AzerVoice xəbər verir ki, bəyanatda İsraili beynəlxalq hüquqa hörmət etməyə və Qəzzaya humanitar yardımın girişinə qoyulan məhdudiyyətləri dərhal aradan qaldırmağa çağırılıb.

Nazirlik qeyd edib ki, İsrailin Qəzzanın mərkəzini də əhatə edən yeni hücumları zorla köçürülmələrə səbəb olmaqla yanaşı, BMT qurumlarının və beynəlxalq humanitar təşkilatların fəaliyyətini əngəlləyir.

“Bu yeni əməliyyatlar kifayət qədər qida və tibbi resursun olmadığı şəraitdə bölgədəki humanitar vəziyyəti daha da pisləşdirir. Bu, İsrailin tətbiq etdiyi blokadanın nəticəsidir” – deyə bəyanatda bildirilib.

Fransa eyni zamanda İsraildən BMT əməkdaşlarının bölgədəki fəaliyyətlərinə şərait yaratmağı və onlara qarşı təzyiqləri dərhal dayandırmağı tələb edib.

BMT-nin hesabatlarına istinadən bildirilib ki, son iki ayda yardım mərkəzlərinə yaxınlaşmağa çalışan mindən çox mülki şəxs İsrailin hücumları nəticəsində həyatını itirib.

İsrail ordusu 19 yanvar tarixində elan edilmiş atəşkəsi 18 mart tarixində pozaraq Qəzzəyə qarşı genişmiqyaslı hücumlara yenidən başlayıb. Fələstin Səhiyyə Nazirliyinin son məlumatına görə, 7 oktyabr 2023-cü ildən bəri Qəzzədə azı 59 min 219 nəfər ölüb, 143 min 45 nəfər isə yaralanıb.

İsrailin 18 martdan sonra həyata keçirdiyi hücumlarda isə 8363 nəfər həlak olub, 31 min nəfərdən çox insan yaralanıb.