BAKI, AzerVoice
İran və onun regional müttəfiqlərinə qarşı hərbi əməliyyatlar hələ başa çatmayıb və ölkə ordusu genişmiqyaslı qarşıdurmaya hazır olmalıdır.
AzerVoice xəbər verir ki, bu barədə İsrail Müdafiə Qüvvələrinin (IDF) Baş Qərargah rəisi general Eyəl Zamir bildirib.
General Zamir bu fikirləri Tel-Əviv yaxınlığında yerləşən Qlilot hərbi kəşfiyyat bazasında keçirilən və son iki ildə ilk dəfə baş tutan “çoxcəbhəli əməliyyat vəziyyətinin qiymətləndirilməsi” toplantısı zamanı səsləndirib.
“İran və onun yaratdığı ox hələ də hədəfimizdədir. Bu kampaniya bitməyib,” – deyə Zamir vurğulayıb.
O, 2026-cı ilin İsrail ordusu üçün hazırlıq və əməliyyat imkanlarını bərpa ili olacağını əlavə edib.
Toplantıda İsrailin yüksək rütbəli generalları ilə birlikdə əməliyyat, kəşfiyyat və strateji vəziyyət dəyərləndirilib. Zamir bildirib ki, IDF bütün cəbhələrdə eyni vaxtda hücum və müdafiə əməliyyatları aparmalı, sərhədləri gücləndirməli, hava üstünlüyünü saxlamalı və kəşfiyyat imkanlarını genişləndirməlidir.
General Qəzza zolağında davam edən hərbi əməliyyatları İsrailin üzləşdiyi “ən mürəkkəb müharibələrdən biri” adlandırıb.
Zamir eyni zamanda Qərb Sahilində, Livanda Hizbullah qüvvələrinə və Suriyada İran mövqelərinə qarşı əməliyyatların da davam etdirilməsinin vacibliyini qeyd edib.
