BAKI, AzerVoice
HƏMAS daxilindəki rabitə problemləri, İsrail ilə HƏMAS arasında Qəzzada atəşkəs və girov mübadiləsi ilə bağlı danışıqların irəliləməsinə əngəl törədir.
AzerVoice xəbər verir ki, bu baradə "The Times of İsrael" nəşri məlumat verib.
Məlumata görə, Qətərin paytaxtı Dohada olan HƏMAS nümayəndə heyəti ötən həftənin sonundan bəri Qəzzadakı rəhbərləri ilə əlaqə saxlaya bilmir. HƏMAS daxilində İsrailin yeni təklifi barədə müzakirələr ötən cümə axşamından bəri davam etsə də, hərəkat hələ də bu təklifə rəsmi cavab verməyib.
Həmçinin bildirilib ki, İsrailin müharibənin əvvəlindən bəri ilk dəfə Qəzzanın mərkəzindəki Deyr əl-Bəlah şəhərinə daxil olması qərarı, HƏMAS rəhbərləri ilə əlaqə qurmaq səylərinə əlavə zərbə vura bilər.
Xatırladaq ki, ötən həftə İsrail, Qəzza zolağında 60 günlük mümkün atəşkəs dövründə hərbi qüvvələrin yenidən yerləşdirilməsinə dair yenilənmiş plan təqdim etmişdi. Lakin HƏMAS bu plana hələ cavab verməyib.
