BAKI, AzerVoice
Macarıstan, Avropa İttifaqının (Aİ) Qəzza zolağındakı hərbi əməliyyatlara görə İsrailə qarşı sanksiya tətbiq etməsi təşəbbüsünü dəstəkləməyəcək.
AzerVoice xəbər verir ki, bu barədə Macarıstanın xarici işlər və xarici iqtisadi əlaqələr naziri Peter Siyarto Brüsseldə Aİ ölkələrinin xarici işlər nazirlərinin görüşündə iştirak edərkən bildirib.
Siyarto vurğulayıb ki, Macarıstanın maraqlarına cavab verən ən vacib məsələ atəşkəsin tezliklə təmin olunması və HƏMAS tərəfindən saxlanılan macar vətəndaşının azad edilməsinə yönəlik razılaşmanın əldə edilməsidir:
“Bu gün Brüsseldə bizə ciddi təzyiq göstəriləcək ki, İsrailə qarşı sanksiyalara qoşulaq. Amma bu, yanlış addım olardı. İndi sanksiya yox, diplomatiya zamanıdır.”
Nazir bu mövqeyini iyulun 13-də İsrailin Xarici İşlər Naziri Gideon Saar ilə telefon danışığında da ifadə edib. O qeyd edib ki, Macarıstan, İsraillə HƏMAS arasında atəşkəsin təmin olunması və girovların azad olunması ilə nəticələnəcək razılaşmanın əldə olunmasına ümid edir. Siyarto əlavə edib ki, hazırkı şəraitdə “dialoqa olan ehtiyac daha da artıb”.
Nazir həmçinin Aİ–İsrail Assosiasiya Şurasının işinin gücləndirilməsi çağırışı ilə çıxış edəcəyini də vurğulayıb:
“Bu baxımdan Macarıstan Avropa İttifaqının israilli vətəndaşları sanksiya siyahısına salmasına qarşı çıxmaqda davam edir.”
Xatırladaq ki, daha əvvəl “Euractiv” nəşri diplomatik mənbələrə istinadla bildirmişdi ki, Aİ-nin xarici siyasət rəhbəri Kaja Kallas iyulun 15-də keçiriləcək iclasda Qəzza zolağındakı vəziyyətlə əlaqədar İsrailə qarşı müxtəlif məhdudlaşdırıcı tədbirlər təklif edəcək. Bu ssenarilər sırasında Aİ–İsrail Assosiasiya Sazişinin qismən və ya tam dayandırılması, israilli rəsmi şəxslərə, hərbçilərə və məskunlaşanlara qarşı sanksiyalar, habelə ticarət və elmi-texniki əməkdaşlığın məhdudlaşdırılması kimi addımlar yer alır.
Qeyd edək ki, Assosiasiya Sazişinin dayandırılması yalnız bütün Aİ ölkələrinin birgə razılığı ilə mümkündür. Mənbələrin fikrincə, Aİ-nin yalnız fərdi şəxslərə qarşı sanksiyalarla kifayətlənməsi daha real görünür. Belə addımları artıq Avstraliya, Böyük Britaniya, Kanada, Yeni Zelandiya və Norveç də atıb.