BAKI, AzerVoice

ABŞ prezidenti Donald Tramp həyat yoldaşı Melaniya Trampın Rusiya prezidenti Vladimir Putinlə bağlı xəbərdarlıqlarının onun mövqeyinə ciddi təsir etdiyini bildirib.

AzerVoice xəbər verir ki, ABŞ prezidenti bu fikirlərini NATO-nun yeni baş katibi Mark Rutte ilə iyunun 14-də baş tutan görüşdən sonra bölüşüb.

O deyib ki, Putinin verdiyi vədlərə baxmayaraq, Melaniya Rusiyanın hücumlarının davam etdiyini xatırladaraq , ona real vəziyyəti göstərib.

Fox News-un məlumatına görə, Tramp Melaniyanın Rusiya ilə bağlı “həqiqətləri” dilə gətirməsinin onun Ukrayna siyasətində ayıq qərarlar verməsinə kömək etdiyini deyib.

Xatırladaq ki, ötən həftəki açıqlamasında Tramp , Putin Ukraynadakı müharibəni dayandırmasa, 50 gün sonra Rusiyaya qarşı sərt iqtisadi sanksiyalar tətbiq ediləcəyini bildirib. Əlavə olaraq, NATO ölkələrinin Ukraynaya silah dəstəyi artırılacaq.

Rusiya atəşkəsə razılıq verməsə, Trampın sözlərinə görə, 100 faizlik tariflər gündəmə gətiriləcək. Bu bəyanat ABŞ-ın Ukraynaya daha güclü dəstək verməyə hazırlaşdığını göstərir.

NATO baş katibi Mark Rutte də Ukraynaya dəstəyin artacağını bəyan edib. O, Almaniya, Finlandiya və Skandinaviya ölkələri, eləcə də Kanada ilə bu istiqamətdə əməkdaşlığın davam etdiyini bildirib.

Almaniyanın müdafiə naziri Boris Pistorius da ABŞ-ın müdafiə naziri Pit Heqset ilə keçirdiyi görüşdə ölkəsinin Kiyevə Patriot sistemləri üçün maliyyə dəstəyi verəcəyini açıqlayıb. “Avropanın təhlükəsizliyi üçün daha böyük məsuliyyət daşımağa hazırıq,” – deyə Pistorius bildirib.

Ukrayna prezidenti Vladimir Zelenski də Trampla son telefon danışığından sonra təşəkkür edib. “Çox yaxşı söhbət oldu,” – deyə Telegram üzərindən paylaşım edən Zelenski, Trampın NATO baş katibi ilə dialoqu barədə məlumat verdiyini bildirib. “Sülh üçün bütün imkanlarımızı səfərbər edəcəyik,” – deyə o əlavə edib.