BAKI, AzerVoice
İlon Mask süni intellekt sahəsində fəaliyyət göstərən startapı "xAI" ilə avtomobil istehsalçısı "Tesla"nı birləşdirməyi məqsədəuyğun hesab etmir.
AzerVoice xəbər verir ki, bu barədə Mask "X" sosial şəbəkəsində yazıb.
Bundan əvvəl Mask açıqlamışdı ki, "Tesla"nın İdarə Heyəti "xAI" startapına sərmayə yatırılması məsələsini səsverməyə çıxaracaq. O, həmçinin qeyd edib ki, bu qərar yalnız ondan asılı olsaydı, "Tesla" artıq çoxdan "xAI"-yə investisiya edərdi.
Daha əvvəl, "The Wall Street Journal" yazmışdı ki, Maskın sahibi olduğu "SpaceX" şirkəti, "xAI"-yə 2 milyard dollar investisiya yatıracaq.
Qeyd edək ki, Mask, "xAI" startapını 2023-cü ilin aprel ayında təsis edib. Şirkət bir neçə ay sonra "Grok" adlı süni intellekt əsaslı çatbotunu təqdim edib. "Grok"-un fərqli cəhətlərindən biri yaradıcılarının fikrincə, senzura tətbiq etməməsi və real vaxtda aktual məlumatlara çıxış imkanı təmin etməsidir.
