BAKI, AzerVoice
Moldova parlamentinə sentyabrın 28-də keçiriləcək növbəti seçkilərlə bağlı seçki dövrü rəsmi olaraq başlayıb.
AzerVoice-un məlumatına görə, bu barədə Mərkəzi Seçki Komissiyası sədrinin müavini Pavel Postike məlumat verib.
O, qeyd edib ki, bu müddət seçki kampaniyası ilə qarışdırılmamalıdır. Kampaniya rəsmi olaraq avqustun 28-də, yəni seçkilərə bir ay qalmış başlayacaq.
“Parlament seçkilərinin seçki dövrü iyulun 14-də başlayır və Konstitusiya Məhkəməsi nəticələri təsdiqləyənə qədər davam edir. Bu dövr namizədlərin irəli sürülməsindən tutmuş yekun hesabatların təqdimatınadək seçkilərin təşkilinə dair əksər prosedurları əhatə edir. Onun dəqiq müddəti əvvəlcədən bəlli deyil və bu, nəticələrin nə qədər tez işlənməsi, mümkün məhkəmə prosesləri və Konstitusiya Məhkəməsinin yoxlama müddətindən asılı olacaq. Seçki kampaniyası isə daha qısa və konkret vaxt aralığını əhatə edir: o, avqustun 28-dən başlayaraq sentyabrın 28-nə qədər davam edəcək və seçki günündən bir gün əvvəl sona çatacaq” – deyə, Postike bildirib.
O əlavə edib ki, seçkidən əvvəlki dövrdə, iyulun 20-dən təxminən avqustun 20-nə qədər namizədlik üçün sənədlərin qəbulu həyata keçiriləcək. "Bu müddətdə siyasi partiyalar, seçki blokları və müstəqil namizədlər qeydiyyat üçün sənədlərini təqdim edə bilərlər” - deyə, o qeyd edib.
MSK rəsmisi həmçinin siyasi təşviqatla seçki təbliğatı arasındakı fərqləri açıqlayıb.
“Avqustun 28-nə qədər partiyalar özlərini tanıdan fəaliyyətlər apara bilər, vətəndaşlarla görüşə bilər, proqramlarını nümayiş etdirə bilərlər, lakin birbaşa “bizə səs verin” çağırışını edə bilməzlər. Avqustun 28-dən etibarən isə artıq açıq şəkildə “bizə səs verin” deyə biləcəklər” – deyə, Postike qeyd edib. O, eyni zamanda etiraf edib ki, praktiki baxımdan “təbliğatla təbliğatı bir-birindən ayırmaq bəzən olduqca çətin olur”.
