BAKI, AzerVoice

ABŞ Prezidenti Donald Trampın xüsusi nümayəndəsi Stiven Uitkoff Qətərin paytaxtı Dohada keçirilən atəşkəs danışıqlarında hələ ki, iştirak etmir.

AzerVoice xəbər verir ki, bu barədə "Al Arabiya" telekanalı məlumat yayıb.

Mənbələrin verdiyi məlumata görə, Uitkoff yalnız məsləhətləşmələr yekun mərhələyə çatdıqda Dohaya gəlməyi planlaşdırır. Həmçinin qeyd olunub ki, hazırda HƏMAS BMT xətti ilə Qəzza zolağına göndəriləcək humanitar yardımın keyfiyyəti ilə bağlı bəndlərə düzəlişlər edir.

Qeyd edək ki, iyulun 6-da HƏMAS və İsrail arasında Misir, Qətər və ABŞ-ın vasitəçiliyi ilə Dohada atəşkəs və Qəzza zolağında saxlanılan israilli girovların azad edilməsi məqsədilə danışıqlar prosesi bərpa olunub. İyulun 8-də Qətər baş nazirinin müşaviri və Xarici İşlər Nazirliyinin rəsmi nümayəndəsi Məcid bin Məhəmməd əl-Ənsari bildirib ki, danışıqlar hələ başlamayıb və Qətər ilə Misir vasitəçiləri hazırda HƏMAS və İsrail nümayəndələri ilə fikir ayrılıqlarının aradan qaldırılması və gələcək danışıqların çərçivəsinin müəyyənləşdirilməsi məqsədilə məsləhətləşmələr aparırlar. O, həmçinin vurğulayıb ki, Qəzza zolağında atəşkəs razılaşmasının əldə olunması vaxt tələb edəcək.