BAKI, AzerVoice

Danimarka və Moldova arasında Moldovanın silahlı qüvvələrinin gücləndirilməsinə yönəlmiş hərbi əməkdaşlıq sazişi imzalanıb.

AzerVoice xəbər verir ki, bu barədə Danimarkanın müdafiə naziri Troels Lund Poulsen Kişinyovda keçirilən mətbuat konfransında məlumat verib.

Məlumata görə, saziş çərçivəsində Danimarka hökuməti dörd il müddətinə 7 milyon ABŞ dolları ayıracaq. Bildirilib ki, bu vəsaitlər hərbi hazırlığa və kiberhücumlarla mübarizəyə yönəldiləcək.

Poulsenin sözlərinə görə, noyabrın 1-dən etibarən Moldovada Danimarkanın hərbi attaşesi fəaliyyətə başlayacaq. Nazir əlavə edib ki, Danimarka, eyni zamanda, Moldova ilə əməkdaşlıq çərçivəsində Ukraynaya dəstək yollarını da araşdırır. Bu əməkdaşlıqda əsas diqqət Moldovanın dayanıqlığının və müdafiə sektorunun gücləndirilməsinə yönələcək.

Bundan əvvəl Danimarka hökuməti parlament fraksiyaları ilə müdafiə xərclərinin artırılmasını razılaşdırmışdı. Qeyd olunurdu ki, 2033-cü ilə qədər Danimarka hakimiyyəti müdafiəyə əlavə olaraq 120 milyard kron (16,83 milyard ABŞ dolları) ayıracaq.