BAKI, AzerVoice, Nailə Babazadə
Avropa İttifaqına (Aİ) üzv ölkələr və digər Avropa dövlətlərinin daxil olduğu Avropa Əməkdaşlıq Topluluğunun (AST) 7-ci zirvəsi 1–2 oktyabr tarixlərində Danimarkanın paytaxtı Kopenhagda baş tutacaq. Zirvə əsasən təhlükəsizlik və müdafiə məsələlərinə həsr olunacaq.
AzerVoice xəbər verir ki, toplantıya Aİ-nin qeyri-rəsmi zirvə görüşü üçün Kopenhagda olan Avropa İttifaqı Şurasının sədri Antonio Kosta və Danimarkanın Baş naziri Mette Frederiksen birgə sədrlik edəcəklər.
Bir çox ölkənin liderləri ilk olaraq 1 oktyabr axşamı Danimarka Krallığının simvollarından biri sayılan Amalienborq sarayında, Kral və Kraliçənin ev sahibliyi ilə keçiriləcək rəsmi şam yeməyində bir araya gələcəklər.
Zirvənin əsas iclasları 2 oktyabr tarixində baş tutacaq. Burada Ukraynanın dəstəklənməsi, Avropanın təhlükəsizlik vəziyyəti və qitənin yeni geosiyasi reallıqlar fonunda necə daha güclü və təhlükəsiz hala gətirilə biləcəyi mövzuları liderlər tərəfindən müzakirə olunacaq.
Yuvarlaq masa formatında keçiriləcək müzakirələrdə ənənəvi və hibrid təhdidlər, iqtisadi təhlükəsizlik, eləcə də miqrasiya idarəçiliyi kimi vacib məsələlər də gündəmdə olacaq.
