BAKI, AzerVoice
Tramp Rusiya ilə bağlı açıqlama verib.
AzerVoice xəbər verir ki, ABŞ
prezidenti Donald Tramp NBC News telekanalına müsahibəsində
Rusiya-Ukrayna müharibəsi ilə bağlı yeni mesajlar verib.
O, 14 iyulda mühüm açıqlama ilə çıxış edəcəyini bildirib.
“Rusiyadan məyus oldum, amma gələcək bir neçə həftədə nə olacağını
görəcəyik,” - deyə qeyd edib.
O, həmçinin ABŞ, NATO və Ukrayna arasında hərbi yardım mexanizminin dəyişdiyini açıqlayıb. Tramp bildirib ki, ABŞ-dan göndərilən silahlar əvvəlcə NATO-ya çatdırılacaq və bu silahların maliyyə məsuliyyəti tam şəkildə NATO tərəfindən qarşılanacaq. Daha sonra həmin silahlar NATO vasitəsilə Ukraynaya ötürüləcək.
Prezident Tramp, “Biz silahları NATO-ya göndəririk və NATO onların pulunu 100 faiz ödəyir. Silahlar əslində NATO-ya gedir. NATO daha sonra bu silahları Ukraynaya verir,” - deyə vurğulayıb.
O, bu razılaşmanın ötən ay keçirilən NATO sammitində əldə edildiyini də xatırladıb. Eyni mexanizmin Patriot hava hücumundan müdafiə sistemlərinə də şamil ediləcəyini deyən Tramp, “Patriot sistemlərini NATO-ya göndərəcəyik, sonra NATO onları paylayacaq,” - deyə əlavə edib.
Qeyd edək ki, Trampın 14 iyul bazar ertəsi günü Rusiya ilə bağlı verəcəyi açıqlama diqqətlə gözlənilir.
