BAKI,
AzerVoice
Texasda daşqın nəticəsində ölənlərin sayı 104-ə çatıb.
AzerVoice xəbər verir ki, ABŞ-ın Texas
ştatında iyulun 4-də başlayan güclü yağışlar nəticəsində baş verən
daşqınlarda həyatını itirənlərin sayı 104-ə yüksəlib.
Ən çox itki Kerr bölgəsində qeydə alınıb – 28-i uşaq olmaqla 84
nəfərin öldüyü bildirilir.
Quadalupe çayının daşması nəticəsində yaranan sel fəlakəti bölgədə geniş miqyaslı dağıntılara səbəb olub. Yerli səlahiyyətlilər bildiriblər ki, təxminən 50 min nəfər fəlakət zonasındadır və axtarış-xilasetmə əməliyyatları davam etdirilir.
Texas qubernatoru Gregg Abbott X sosial şəbəkəsində paylaşdığı açıqlamada bütün dövlət resurslarının səfərbər olunduğunu qeyd edib. ABŞ prezidenti Donald Tramp isə Kerr qraflığını rəsmi fəlakət bölgəsi elan edib.
Bununla yanaşı, bəzi Respublikaçı yerli rəsmilər, prezident Trampın qənaət siyasəti nəticəsində büdcəsi azaldılan Milli Hava Xidməti (NWS)-ni fəlakət öncəsi lazımi xəbərdarlıq etmədiyinə görə tənqid ediblər.
