BAKI, AzerVoice
Amerikalı iş adamı İlon Mask ABŞ Prezidenti Donald Trampa qarşı münasibətini dəyişdiyini açıqlayıb.
AzerVoice xəbər verir ki, bu barədə Mask X sosial şəbəkəsində yazıb.
Onun sözlərinə görə, bu dəyişikliyə səbəb Trampın ölkə büdcəsi kəsirini artıran siyasətidir.
“Büdcə kəsirinin [sabiq prezident Co] Bayden dövründəki 2 trilyon dollarlıq göstəricidən 2,5 trilyon dollara yüksəlməsi ölkəni müflisliyə aparır” - deyə o, istifadəçilərdən birinin verdiyi sualına cavab verib.
Qeyd edək ki, İlon Mask, bir müddət ABŞ hökumətində dövlət işlərinin səmərəliliyini artırmaq üzrə agentliyin (DOGE) koordinatoru kimi fəaliyyət göstərib və ictimai əsaslarla, xüsusi statusla dövlət qulluqçusu olub. Lakin Amerika mətbuatının yazdığına görə, Trampla Mask arasında münasibətlər sonradan bir sıra səbəblərdən, o cümlədən Maskın biznes maraqları ilə bağlı pozulmağa başlayıb.
Mask dövlət xidmətindən ayrıldıqdan sonra, iyunun 5-də tərəflər sosial şəbəkələr vasitəsilə açıq qarşıdurmaya girdilər. Mask bəyan etdi ki, ötən ilin noyabr ayında keçirilən seçkilərdə onun dəstəyi olmasaydı, Tramp qalib gələ bilməzdi. O, Trampa qarşı yeni impiçment cəhdini dəstəklədiyini bildirdi və Tramp administrasiyasının irəli sürdüyü, dövlət borcu həddini 5 trilyon dollar artırmağı nəzərdə tutan qanun layihəsini tənqid etdi.
30 iyun tarixində Mask bildirmişdi ki, əgər bu qanun layihəsi qəbul edilərsə, ertəsi gün yeni bir partiya yaradacaq. İyulun 3-də ABŞ Konqresinin Nümayəndələr Palatası Senatdan sonra qanun layihəsini qəbul etdi və iyulun 4-də Tramp onu imzaladı. İyulun 5-də isə İlon Mask “Amerika” adlı yeni siyasi partiyanın qurulduğunu elan etdi.
