BAKI, AzerVoice
Ukrayna Danimarka ilə silah istehsalı üzrə müqavilə imzalayıb.
AzerVoice xəbər verir ki, bu barədə Ukrayna Prezidenti Volodimir Zelenski "Telegram" kanalında yayımladığı videomüraciətində deyib.
Zelenskinin sözlərinə görə, Kiyev və Kopenhagen bu razılaşmaya ötən gün nail olublar. Müqaviləyə əsasən, Ukrayna Danimarka Krallığı ərazisində silah istehsal edəcək. Bu, Ukraynanın xarici ölkədə həyata keçirəcəyi ilk bu cür layihə olacaq.
Ukrayna Prezidenti əlavə edib ki, bu razılaşma tək olmayacaq və gələcəkdə digər silah növləri, xüsusilə pilotsuz uçuş aparatları (PUA) ilə bağlı da oxşar müqavilələr imzalanacaq.
Zelenski həmçinin bildirib ki, Ukrayna ABŞ-la da PUA sahəsində əməkdaşlıqla bağlı razılıq əldə edib. Onun sözlərinə görə, Kiyev və Vaşinqton birgə işi əhəmiyyətli dərəcədə genişləndirəcək və artıq bu il Ukrayna ABŞ-dan xüsusi şərtlərlə yüz minlərlə dron əldə edə biləcək.
Qeyd edək ki, aprel ayında Zelenski Ukraynanın PUA istehsalını maksimum səviyyədə artıracağını bəyan etmişdi. O, cari il üçün bu sahədə yaxşı perspektivlərin olduğunu vurğulamış və ordunun bütün dron komponentləri ilə fasiləsiz və sabit şəkildə təchiz edilməsinin vacibliyini qeyd etmişdi.
Xatırladaq ki, daha əvvəl ABŞ prezidenti Donald Tramp da Ukraynaya silah satmaq istədiyini bəyan etmişdi.
