BAKI, AzerVoice

ABŞ Prezidenti Donald Trampın xüsusi nümayəndəsi Stiven Uittkof, növbəti həftə Norveçin Oslo şəhərində İranın Xarici İşlər naziri Seyid Abbas Araqçi ilə görüşərək Tehranının nüvə proqramı ilə bağlı danışıqları bərpa etməyi planlaşdırır.

AzerVoice xəbər verir ki, bu barədə Axios portalı mənbələrə istinadən məlumat verib.

Məlumata görə, görüşün dəqiq tarixi hələ müəyyən edilməyib. Ağ Ev nümayəndəsi bildirib ki, hazırda "səfər haqqında heç bir açıqlama yoxdur".

Mənbələr həmçinin bildirib ki, Uittkof və Araqçi iyun ayında İsrail və İran arasında baş vermiş 12 günlük münaqişə dövründə və sonrasında "birbaşa əlaqəni davam etdirmişdilər".

Bundan əvvəl İsrailin N12 telekanalı xəbər vermişdi ki, Vaşinqton Tehranla nüvə proqramı üzrə danışıqları bərpa etmək üçün növbəti həftə Oslo şəhərində təmaslar qurur.

Xatırladaq ki, 25 iyun tarixində Tramp, ABŞ-İran nüvə proqramı üzrə danışıqlarının bu həftə başlayacağını bildirmişdi. İyunun 28-də isə "NBC News" telekanalı, Uittkofun yaxın günlərdə İran rəsmiləri ilə nüvə proqramı ilə bağlı mümkün razılaşmanın müzakirəsi üçün görüşəcəyini bildirmişdi. İyunun 30-da Ağ Ev Uittkofun hələ də İranla nüvə proqramı ilə bağlı müzakirələri davam etdirdiyini açıqlamış, lakin bu həftə görüşlərin olub-olmayacağı barədə dəqiq məlumat verməmişdi.