BAKI, AzerVoice

Sudan Silahlı Qüvvələri Birləşmiş Millətlər Təşkilatının Əl-Fəşir şəhərində humanitar yardım çatdırılmasını təmin etmək məqsədilə irəli sürdüyü bir həftəlik atəşkəs təklifini qəbul etdiyini açıqlayıb.

AzerVoice xəbər verir ki, BMT-nin Baş katibi Antonio Quterreş Sudan ordusunun baş komandanı, general Əbdülfəttah əl-Burhanla telefon əlaqəsi saxlayaraq Şimali Darfur əyalətinin paytaxtı Əl-Fəşirdə humanitar fasilə verilməsi üçün razılıq istəyib.

Burhan bu təklifi qəbul etdiyini bildirib və BMT Təhlükəsizlik Şurasının aidiyyəti qətnamələrinin icrasının vacibliyini vurğulayıb. Lakin paramilitar Rapid Support Forces (RSF) adlı hərbi dəstənin bu atəşkəslə razılaşacağı və əməl edəcəyi hələ ki bəlli deyil.

Quterreş: “Əl-Fəşirdə vəziyyət faciəvidir”
“Biz hər iki tərəflə bu məqsədlə əlaqə saxlayırıq və bu, telefon danışığımızın əsas səbəbi idi. Əl-Fəşirdə vəziyyət dramatik xarakter alıb,” – deyə Quterreş cümə günü jurnalistlərə açıqlama verib.

Hazırda atəşkəsin dəqiq şərtləri və nə vaxt qüvvəyə minəcəyi ilə bağlı əlavə təfərrüatlar açıqlanmayıb.

Qeyd edək ki, 2023-cü ildən davam edən müharibə 20 mindən çox insanın ölümünə səbəb olubbmt
Sudanda vətəndaş müharibəsi 2023-cü ilin aprelində, ordu ilə RSF arasında uzunmüddətli gərginliyin silahlı toqquşmalara çevrilməsi ilə başlayıb. Müharibə əvvəlcə paytaxt Xartumda, sonra isə bütün ölkə ərazisində yayılıb və 20 min nəfərdən çox insanın həyatına son qoyub.

Bundan əlavə, 14 milyondan çox insan evlərini tərk etməyə məcbur olub, bəzi bölgələrdə isə aclıq səviyyəsi kritik həddə çatıb. BMT-nin Uşaq Fondu – UNICEF bu ilin əvvəlində bildirmişdi ki, təxminən 61 min 800 uşaq müharibə səbəbilə ölkə daxilində məcburi köçkünə çevrilib.

Əl-Fəşirdə genişmiqyaslı yardım hazırlığı tələb olunur
Quterreş bildirib ki, effektiv humanitar yardımın çatdırılması üçün öncədən razılaşdırılmış atəşkəs vacibdir və bu, Əl-Fəşir kimi son zamanlar dəfələrlə zorakılıqla üzləşmiş bölgələrdə daha da önəm daşıyır.

Məlumat üçün bildirək ki, Əl-Fəşir, paytaxt Xartumdan 800 kilometrdən (500 mil) çox məsafədə, ölkənin cənub-qərbində yerləşir və hazırda ordu qüvvələrinin nəzarəti altındadır.

Paramilitar RSF qüvvələri artıq bir ildən çoxdur ki, Əl-Fəşiri ələ keçirməyə çalışır. Onların məqsədi bütün Darfur bölgəsində tam nəzarət qurmaqdır. Bu məqsədlə, şəhərə və onun ətrafındakı aclıqdan əziyyət çəkən iki əsas köçkün düşərgəsinə dəfələrlə hücumlar həyata keçiriblər.