BAKI,AzerVoice

Qətər Dövləti Birləşmiş Millətlər Təşkilatının (BMT) Nizamnaməsinə sarsılmaz sadiqliyini yenidən bəyan edərək, beynəlxalq təşkilatın fəaliyyətinə dəstəyini, onun tərəfdaşlıqlarının möhkəmləndirilməsinə və BMT-nin səmərəliliyini, çevikliyini və qlobal problemlərə reaksiyasını artırmaq məqsədi daşıyan islahatlara verdiyi dəstəyi vurğulayıb. AzerVoice xəbər verik ki, bu fikirlər Qətər Dövlətinin BMT-dəki Daimi Nümayəndəsi xanım Şeyxa Alya Əhməd bin Seyf Əl-Taninin BMT Təhlükəsizlik Şurasının “Birləşmiş Millətlər Təşkilatı: Gələcəyə baxış” mövzusunda keçirilən açıq debatında Nyu-Yorkdakı BMT Baş Qərargahında səsləndirdiyi bəyanatda yer alıb.

Şeyxa Alya qeyd edib ki, ötən səksən il ərzində BMT çoxtərəfli diplomatiyanın təşviqi və Nizamnamənin məqsədlərinin reallaşdırılması üçün əvəzolunmaz qlobal platforma rolunu oynayıb. O, təşkilatın dünyanın müxtəlif regionlarında münaqişələrin qarşısının alınması və nəzarətdə saxlanılması istiqamətində əldə etdiyi mühüm uğurları vurğulayıb və BMT-nin beynəlxalq sülh və təhlükəsizliyin qorunmasında həlledici rolunu qeyd edib.

Səfir bildirib ki, Qətər BMT Nizamnaməsinin prinsiplərinə və məqsədlərinə sadiq olan strateji tərəfdaş olaraq qalır və dünyanın müxtəlif bölgələrində vasitəçilik, münaqişələrin dinc yolla həlli və gərginliyin azaldılması sahəsində aparıcı rol oynayır.

O, Qətərin son dövrlərdəki nailiyyətlərini xüsusi vurğulayaraq, Misir Ərəb Respublikası, Türkiyə Respublikası və ABŞ ilə birgə həyata keçirdiyi uğurlu vasitəçilik nəticəsində 13 oktyabrda Qəzzada atəşkəs razılaşmasının əldə olunması və müharibənin başa çatması ilə nəticələnən prosesi xatırladıb. Bu razılaşma iki illik fasiləsiz səylərin nəticəsi olub və məqsədi qan tökülməsinin dayandırılması, humanitar əzabların aradan qaldırılması, əsirlərin və girovların azadlığa buraxılmasını təmin etmək idi.

Şeyxa Alya əlavə edib ki, Qətər vasitəçilik və gərginliyin azaldılması istiqamətində səylərini davam etdirir. O, bu ayın əvvəlində Pakistan İslam Respublikası və Əfqanıstanın müvəqqəti hökuməti nümayəndə heyətlərinin Dohada keçirilən görüşünə toxunaraq, bu təşəbbüsün iki ölkə arasında dialoqun asanlaşdırılması və sabitliyin təşviqi məqsədilə Türkiyə ilə əməkdaşlıq çərçivəsində həyata keçirildiyini bildirib.

Qətərin Afrika qitəsindəki təşəbbüslərinə də diqqət çəkən səfir, mart ayında Ruanda Respublikası və Konqo Demokratik Respublikası arasında keçirilən dialoqun nəticəsi olaraq, bu il 14 oktyabrda “Doha Prinsipləri Bəyannaməsi” (iyul 2025) əsasında atəşkəsin monitorinqi və yoxlanması mexanizminin imzalanmasını xatırladıb və bu istiqamətdəki məsuldar tərəfdaşlığına görə ABŞ-a təşəkkürünü ifadə edib.

O, çıxışında BMT sisteminin hərtərəfli nəzərdən keçirilməsinin və fəaliyyət metodlarının müasirləşdirilməsinin vacibliyini vurğulayıb. Qətər BMT Təhlükəsizlik Şurası və Baş Assambleyanın qətnamələrinin seçicilikdən uzaq, məsuliyyət və şəffaflıq prinsiplərinə əsaslanaraq icrasını təmin edəcək mexanizmlərin yaradılmasını dəstəkləyir.

Şeyxa Alya BMT-yə olan etimad böhranının aradan qaldırılması üçün dialoq ruhunun canlandırılması, təşkilat daxilində əməkdaşlığın və birliyin gücləndirilməsi, eləcə də qlobal idarəetmədə çoxtərəfliliyin və inklüzivliyin təmin olunması, xüsusilə kiçik və inkişaf etməkdə olan dövlətlərin qərarvermə prosesində daha aktiv rol almasının vacibliyini qeyd edib.

O, həmçinin BMT islahatlarının sürətləndirilməsinin və “BMT 80” təşəbbüsünün üç istiqamətdə həyata keçirilməsinin zəruriliyini vurğulayıb və Baş katibin “İnsanlar və planet naminə dönüş nöqtəsi: Bu gün və gələcək üçün effektiv və inklüziv qlobal idarəetmə” adlı hesabatında irəli sürülən təklifləri yüksək qiymətləndirib.

Çıxışının sonunda Şeyxa Alya “Yeni sülh gündəliyinin” əhəmiyyətini vurğulayıb. Bu gündəlik qarşısının alınmasına investisiya, münaqişələrin kök səbəblərinin aradan qaldırılması, dayanıqlı sülhün qurulması və vasitəçiliyin gücləndirilməsi istiqamətlərinə fokuslanır. O, bu baxışın uğurla həyata keçirilməsinin BMT daxilində effektiv mexanizmlərin mövcudluğundan və güclü siyasi iradədən asılı olduğunu qeyd edib.