BAKI, AzerVoice
ABŞ və Çin arasında yeni ticarət sazişi imzalanıb.
AzerVoicexəbər verir ki, ABŞ
prezidenti Donald Tramp Çinlə ticarət müqaviləsinin imzalandığını
açıqlayıb.
O, həmçinin Hindistanla da yaxın zamanda “çox böyük bir anlaşma”
əldə olunacağını bildirib.
Ağ Evdə iqtisadi məsələlərlə bağlı çıxış edən Tramp, Maliyyə naziri Scott Bessent, Ticarət naziri Howard Lutnick və Ticarət Nümayəndəsi Jamieson Greer-in digər ölkələrlə ticarət əlaqələrinin genişləndirilməsi üçün fəal işlədiklərini vurğulayıb.
“Çinlə razılaşdıq. Bəziləri ilə isə razılaşmayacağıq. Onlara sadəcə məktub göndərib deyəcəyik: təşəkkür edirik, siz 25, 35 və ya 45 faiz tarif ödəyəcəksiniz”, – deyə Tramp əlavə edib. ABŞ prezidentinin sözlərinə görə, Çinlə imzalanan yeni saziş bu ölkənin bazarlarının açılmasına səbəb olacaq.
Tramp əlavə edib ki, ticarət siyasəti çərçivəsində ölkəyə investisiya axını artıb və bunun nəticəsində ABŞ-a çip istehsalı üçün 60 milyard dollarlıq yeni sərmayə yatırılıb.
Qeyd edək ki, Tramp çıxışında ABŞ Federal Ehtiyat Sisteminin sədri Cerom Powelı da tənqid edərək, “Əgər faizləri azaldan biri olsaydı, iqtisadiyyat daha da sürətlənərdi. Təəssüf ki, bu adamla mübarizə aparmaq məcburiyyətindəyik. Öz işini yerinə yetirmir”, – deyə bildirib.
