BAKI, AzerVoice

İranın xarici işlər naziri Seyid Abbas Araqçi bildirib ki, ötən gecə ABŞ tərəfindən İranın nüvə obyektlərinə edilən hava hücumları nəticəsində obyektlərə dəyən zərərin dəqiq həcmi barədə hələlik məlumat yoxdur.

AzerVoice-un məlumatına görə, İstanbulda keçirilən mətbuat konfransında çıxış edən Araqçi vurğulayıb ki, bu mərhələdə xəsarətin miqyasından daha önəmli olan məsələ, İranın dinc məqsədli nüvə infrastrukturlarına edilən hücumun beynəlxalq hüququn açıq-aşkar şəkildə pozulmasıdır:

“Bu cür təcavüzkar davranışlara göz yumulmamalıdır. Beynəlxalq ictimaiyyət məsuliyyətli davranmalı və bu cür hücumların qarşısını almaq üçün konkret addımlar atmalıdır”, – deyə o qeyd edib.

Araqçi əlavə edib ki, hadisədən dərhal sonra bir sıra region ölkələrinin xarici işlər nazirləri ilə telefon danışıqları aparılıb. Söhbətlər zamanı İrana qarşı hücumların dərhal dayandırılmasının vacibliyi vurğulanıb və bu hücumların qarşısını almaq üçün hüquqi və siyasi həll yollarının tapılması məsələsi gündəmə gətirilib.

Nazir beynəlxalq hüquq və qanuni müdafiə prinsiplərinə istinad edərək, İranın özünü müdafiə etmək hüququna malik olduğunu da xatırladıb:

“Bu hüquq İran xalqını, milli təhlükəsizliyi və dövlətin suverenliyini qorumaq üçün zəruri olduğu anda icra olunacaq.”

Qeyd edək ki, ötən gecə ABŞ Hərbi Hava Qüvvələri İranın Fordo, Natanz və İsfahan şəhərlərində yerləşən nüvə obyektlərinə hava hücumu həyata keçirib. Qeyri-rəsmi məlumatlara əsasən, obyektlərdə ciddi dağıntılar baş verib.