BAKI, AzerVoice

İsrail Baş naziri Benyamin Netanyahu-nun ABŞ-ın Ankaradakı səfiri və Suriya üzrə xüsusi nümayəndəsi Tomas Barak ilə görüşündə Dəməşqlə yeni danışıqlar prosesinə başlamaq istədiyini və bu prosesdə Vaşinqtonun vasitəçiliyini tələb etdiyi iddia olunur.

AzerVoice xəbər verir ki, Netanyahu 1974-cü il tarixli razılaşmanı müəyyən dəyişikliklərlə yeniləyərək yeni təhlükəsizlik mexanizmi yaratmaq və nəticə etibarilə Suriya ilə sülh sazişi imzalamağa çalışır.

İddialara əsasən, Netanyahu hökuməti Suriya Prezidenti Əhməd Əl-Şaraa rəhbərliyindəki yeni administrasiya ilə ilkin olaraq dolayı yollarla təmas qurub, daha sonra isə üçüncü ölkələrdə gizli görüşlər keçirib.

ABŞ mətbuatına danışan və adlarının açıqlanmasını istəməyən rəsmi şəxslər, bu təşəbbüsün həyata keçəcəyi təqdirdə, bunun 2011-ci ildən bəri İsrail və Suriya arasında ilk rəsmi təmas olacağını bildiriblər. Netanyahu administrasiyası bu prosesi diplomatik fürsət kimi qiymətləndirir və tammiqyaslı sülh danışıqlarına hazır olduqlarını bəyan edir.

ABŞ nümayəndəsi Tomas Barak görüş zamanı Suriya Prezidenti Əhməd Əl-Şaraanın İsraillə danışıqlara müsbət yanaşdığını bildirib.

İsrail tərəfinin isə ABŞ rəsmilərinə yeni razılaşma əldə olunana qədər Suriya ərazisindəki hərbi mövcudluğunu davam etdirəcəyini bildirdiyi vurğulanır.