BAKI, AzerVoice
ABŞ və Çin arasında 9 iyun tarixində Londonda keçiriləcək ticarət nazirləri səviyyəsində görüşdə əsas diqqət tariflərə deyil, ixrac nəzarətinə yönələcək.
AzerVoice xəbər verir ki, bu barədə The Wall Street Journal qəzeti məlumat yayıb.
Nəşrin qeyd etdiyinə görə, son həftələrdə iki ölkə arasındakı ticarət mübahisəsində diqqət tariflərdən daha çox ixrac məhdudiyyətlərinə yönəlib.
Mənbələrin bildirdiyinə görə, may ayında ABŞ-ın ticarət danışıqları üzrə nümayəndəsi Ceymison Qrir və Çindən olan həmkarı Li Çenqanq artıq ixrac nəzarət qaydaları ilə bağlı məsələləri müzakirə ediblər. İyunun 9-da aparılacaq danışıqlarda ABŞ ticarət naziri Hovard Latnikin iştirak etməsi Pekin üçün müsbət siqnal kimi dəyərləndirilir və bu, ABŞ prezidenti Donald Trampın problemin ciddiliyinə diqqət yetirdiyini göstərir.
Londonda keçiriləcək görüşdə Vaşinqtonun Çindən ABŞ-a nadir torpaq elementlərinin tədarükünün artırılmasını istəməsi planlaşdırılır. Çin nümayəndə heyəti isə ABŞ nümayəndələrindən reaktiv mühərriklər və yarımkeçiricilərlə bağlı texnologiyaların satışının bərpasını tələb edəcək.
Nəşr yazır ki, Çin üçün daha bir vacib məsələ ABŞ-ın mayın 12-də "Huawei Ascend" markalı Çin çiplərindən istifadənin guya riskli olması ilə bağlı verdiyi bəyanatdır. Bu açıqlama ABŞ Maliyyə Nazirliyində bəzi rəsmiləri təəccübləndirib və məyus edib. Buna cavab olaraq Çin Ticarət Nazirliyi 10–11 may tarixlərində Cenevrədə keçirilmiş danışıqlarda əldə olunan razılaşmanın pozulduğunu bəyan edib.
ABŞ prezidenti Donald Tramp daha əvvəl bildirmişdi ki, Londondakı danışıqlarda Latniklə yanaşı maliyyə naziri Skott Bessent və ABŞ-ın ticarət danışıqları üzrə nümayəndəsi Ceymison Qrir də iştirak edəcək. Çin nümayəndə heyətinə isə Çin Xalq Respublikasının vitse-premyeri He Lifen rəhbərlik edəcək. Çin Xarici İşlər Nazirliyi məlumat verib ki, He Lifen 8–13 iyun tarixləri arasında Böyük Britaniyaya səfər edəcək və bu müddət ərzində ABŞ nümayəndələri ilə ticarət məsələləri üzrə danışıqlar aparacaq.
