BAKI, AzerVoice
Çinin Baş nazir müavini He Lifen 8-13 iyun tarixləri arasında Böyük Britaniyaya səfər edəcək və bu müddət ərzində ABŞ nümayəndələri ilə ticarət məsələləri üzrə danışıqlar aparacaq.
AzerVoice xəbər verir ki, bu barədə Çinin Xarici İşlər Nazirliyi məlumat verib.
"Britaniya hökumətinin dəvəti ilə, Çin Kommunist Partiyasının Mərkəzi Komitəsinin Siyasi Bürosunun üzvü və Dövlət Şurasının Baş nazir müavini He Lifən 8-13 iyun tarixlərində Böyük Britaniyaya səfər edəcək. Səfər zamanı o, Çin-ABŞ ticarət-iqtisadi məsləhət mexanizmi çərçivəsində ilk görüşü keçirəcək" — deyə məlumatda bildirilib.
Daha əvvəl ABŞ Prezidenti Donald Tramp bildirib ki, ABŞ nümayəndə heyətində maliyyə naziri Skott Bessent, ticarət naziri Hovard Latnik və ABŞ-ın ticarət danışıqları üzrə nümayəndəsi Ceymison Qrir yer alacaq.
Qeyd edək ki, Çin və ABŞ arasında ticarət-iqtisadi məsləhət mexanizmi, 10-11 may tarixlərində Cenevrədə keçirilən danışıqların nəticəsi olaraq yaradılıb. O zaman Pekin və Vaşinqton qarşılıqlı tarifləri qismən azaltmaq barədə razılığa gəlib. May ayında bu tariflərin ümumi həcmi 100 faizi keçmişdi.
Gələcək görüşün London şəhərində keçirilməsi gözlənilir. İyunun 5-də Çin Prezidenti Si Cinpin və ABŞ Prezidenti Donald Tramp arasında telefon danışığı olub. İki lider mümkün qədər tez bir zamanda yeni ticarət-iqtisadi danışıqlar mərhələsinin keçirilməsi barədə razılığa gəliblər.
