BAKI, AzerVoice
Microsoft Rusiyada fəaliyyətini tam dayandırır.
AzerVoice xəbər verir ki, ABŞ-ın
texnologiya nəhəngi Microsoft Rusiyadakı törəmə şirkəti “Microsoft
Rus” MMC-nin iflasını rəsmən elan etməyə hazırlaşır.
Bu qərar şirkətin Rusiyadakı fəaliyyətinin tamamilə dayandırılması
istiqamətində atılan son addım kimi qiymətləndirilir.
Xatırladaq ki, Rusiya prezidenti Vladimir Putin daha əvvəl Microsoft və Zoom kimi Qərb texnologiya şirkətlərini birbaşa hədəf alaraq bu xidmətlərin yerli alternativlərlə əvəz olunmasının vacibliyini vurğulamışdı. Rusiya rəqəmsal müstəqillik strategiyası çərçivəsində bu şirkətlərin fəaliyyətini məhdudlaşdırmağa yönəlik addımlar atmışdı.
Microsoft 2022-ci ilin fevralında başlayan Rusiya-Ukrayna müharibəsindən sonra ölkədəki fəaliyyətini mərhələli şəkildə azaltmağa başlamışdı. Həmin ilin iyununda verilən açıqlamada, şirkət dəyişən iqtisadi şərait və strateji planlara əsasən fəaliyyətini minimuma endirdiyini bildirmişdi.
Hazırda “Microsoft Rus” MMC-nin iflas prosesi gündəmdə olsa da, “Microsoft İnkişaf Mərkəzi Rus”, “Microsoft Mobile Rus” və “Microsoft Payments Rus” kimi törəmə qurumların gələcək taleyi hələlik məlum deyil.
Qeyd edək ki, 2022-ci ildə Google da Rusiyada oxşar taleyi yaşamışdı. “Google Rus” MMC bank hesablarının dondurulması səbəbindən əməliyyatlarını davam etdirə bilmədiyini açıqlayaraq iflas etmişdi. Bu tendensiya Qərb texnologiya şirkətlərinin Rusiya bazarından ard-arda çıxışını gündəmə gətirib.
