BAKI, AzerVoice
Kanada ABŞ Federal Beynəlxalq Ticarət Məhkəməsinin Donald Trampın Kanada da daxil olmaqla bir sıra ölkələrdən idxal edilən mallara tətbiq etdiyi gömrük rüsumlarının bloklanması ilə bağlı qərarını alqışlayıb.
AzerVoice xəbər verir ki, bu barədə Kanadanın Baş naziri Mark Karni parlamentdə çıxışı zamanı bildirib.
"Kanada hökuməti, ABŞ məhkəməsinin dünənki qərarını alqışlayır. Bu qərar, Kanadanın uzun illərdir müdafiə etdiyi mövqeyinə uyğundur: Trampın Kanada məhsullarına tətbiq etdiyi rüsumlar qanunsuz və əsassızdır" - deyə, Karni qeyd edib.
Eyni zamanda, Baş nazir vurğulayıb ki, ABŞ-la ticarət münasibətləri hələ də ciddi təhlükə altındadır. Çünki Tramp administrasiyası tərəfindən Kanada poladı, alüminiumu və avtomobil sektoruna tətbiq edilən bəzi tariflər hələ də qüvvədədir. Karni əlavə edib ki, Ottava ABŞ-la normal ticarət əlaqələrinin bərpasına ümid edir.
Xatırladaq ki, ABŞ Federal Beynəlxalq Ticarət Məhkəməsi Trampın bir sıra ölkələrdən idxala əlavə rüsumlar tətbiq etmək qərarını onun prezident səlahiyyətlərini aşması səbəbilə ləğv edib. Məhkəmənin qərarı Trampın aprelin 2-də elan etdiyi 185 ölkə və regiondan olan məhsullara qarşı tarifləri və Kanada, Çin və Meksikadan idxal edilən mallara qarşı daha əvvəl tətbiq edilmiş bəzi rüsumları da əhatə edir. Bu tariflər, həmin ölkələrin fentanil qaçaqmalçılığı ilə kifayət qədər mübarizə aparmamasına görə əsaslandırılmışdı.
CNN kanalının verdiyi məlumata görə, məhkəmənin qərarı polad, alüminium, avtomobil və onların ehtiyat hissələri ilə bağlı tariflərə aid deyil. Çünki bu rüsumlar "Ticarətin Genişləndirilməsi Qanunu”na əsasən tətbiq olunub. Məhkəmə isə Trampın başqa bir qanuna əsasən səlahiyyətlərini aşdığını müəyyən edib. Nəticədə, bu qərar Çin məhsullarına tətbiq edilən 30 faizlik, Meksika və Kanadadan gətirilən bəzi mallara tətbiq olunan 25 faizlik və universal 10 faizlik tariflərə təsir edəcək.
Tramp administrasiyası artıq məhkəmə qərarından apellyasiya şikayəti verəcəyini açıqlayıb.
Həmçinin xatırladaq ki, aprel ayının sonunda ABŞ-ın 12 ştatı Trampın gömrük siyasətinə qarşı Federal Beynəlxalq Ticarət Məhkəməsinə iddia təqdim etmişdi. Onlar Trampı fövqəladə vəziyyət elan etməklə Konqresin təsdiqini almadan ticarət tariflərini dəyişməkdə ittiham etmişdilər. İddianı ilk olaraq Oreqon ştatının baş prokuroru qaldırmış, onu Arizona, Vermont, Delaver, İllinoys, Kolorado, Konnektikut, Minnesota, Meyn, Nevada, Nyu-York və Nyu-Meksiko ştatları dəstəkləmişdi.
