BAKI, AzerVoice

Tramp və Netanyahunun İranla bağlı danışığında gərginlik yaşanıb.

AzerVoice xəbər verir ki, İsrailin Kanal 12 televiziya kanalı ABŞ prezidenti Donald Tramp və İsrailin baş naziri Benyamin Netanyahu arasında ötən həftə keçirilmiş telefon danışığı zamanı İranla bağlı ciddi fikir ayrılıqlarının yaşandığını bildirib.

Məlumata görə, Tramp danışıqlarda “İranla diplomatik yolla razılaşma əldə etmək istəyirəm. Düşünürəm ki, yaxşı bir razılaşma mümkündür”, – deyə bildirib və hər iki tərəfin maraqlarına uyğun həll yolu axtardığını vurğulayıb. Bu yanaşma, daha əvvəl hər iki liderin İranın nüvə silahı əldə etməsinin qarşısının alınması ilə bağlı tam razılığa gəldiyi barədə yayılan məlumatlarla ziddiyyət təşkil edir.

İsrail mediası Tramp və Netanyahunun danışıqlarını "gərgin" kimi təqdim etsə də, baş nazirin ofisi bu iddiaları təkzib edib. Rəsmi açıqlamada tərəflərin İranın nüvə silahına sahib olmaması mövzusunda razılıq əldə etdiyi bildirilib.

ABŞ Daxili Təhlükəsizlik naziri Kristi Noem-in Netanyahuyla keçirdiyi görüş də bu kontekstdə diqqət çəkib. O, Fox News-a müsahibəsində Prezident Trampın İranla bağlı qərar vermək üçün vaxtının az olduğunu qeyd edərək, Netanyahu ilə koordinasiyalı şəkildə hərəkət etməyin vacibliyini bildirib. “İsraillə paylaşdığımız kəşfiyyat məlumatları danışıqlarda böyük rol oynayır”, – deyə o əlavə edib.

Tramp, diplomatik səylərin nəticəsiz qalacağı təqdirdə, İrana qarşı hərbi variantın da gündəmdə olduğunu istisna etməyib.

Qeyd edək ki, Beynəlxalq Atom Enerjisi Agentliyinin məlumatına əsasən, İran hazırda uranı 60 faizədək zənginləşdirir ki, bu da 2015-ci ildə imzalanan nüvə sazişində nəzərdə tutulan 3,67 faiz həddini çox üstələyir. Atom bombası üçün tələb olunan zənginləşdirmə səviyyəsi isə 90 faizdir.