BAKI, AzerVoice
İndoneziyada 5,7 bal gücündə zəlzələ nəticəsində 100-dən çox evə ziyan dəyib
AzerVoice xəbər verir ki, İndoneziyanın Sumatra adasındakı Benqkulu şəhəri yaxınlığında baş verən 5,7 bal gücündə zəlzələ nəticəsində yüzdən çox ev və bir neçə ictimai obyektə ziyan dəyib.
İndoneziya Meteorologiya, İqlim və Geofizika Agentliyi (BMKG) məlumatına görə, yerli vaxtla saat 02:50-də Benqkulu şəhərindən 43 kilometr cənub-qərbdə 5,7 bal gücündə zəlzələ qeydə alınıb. ABŞ Geoloji Xidməti (USGS) zəlzələnin 68 kilometr dərinlikdə baş verdiyini açıqlayıb. Hadisədən sonra sunami təhlükəsi elan edilməyib.
Milli Fəlakətlərin Azaldılması Agentliyinin (BNPB) sözçüsü Əbdül Muhari bildirib ki, zəlzələ nəticəsində Benqkuluda 100-dən çox ev və 6 ictimai obyekt zərər görüb, şəhərin mərkəzində isə 8 ev tamamilə dağılıb.
Benqkulu vilayətinin qubernatoru Helmi Həsən tələfat qeydə alınmadığını və zərərçəkmiş ailələrə dəstək göstəriləcəyini bildirib. Qubernator vurğulayıb ki, ciddi ziyan dəymiş evlərin bərpası, digər evlərin isə təmiri üçün dövlət yardım proqramları həyata keçiriləcək.
Qeyd edək ki, İndoneziya Sakit okean “Alov halqası” üzərində yerləşdiyindən tez-tez zəlzələlər və vulkanik püskürmələrlə qarşılaşır.
