BAKI,
AzerVoice
Tramp administrasiyası Yunanıstan limanlarına marağını artıraraq
Çinlə rəqabətdə yeni səhifə açır.
AzerVoice xəbər verir ki, ABŞ prezidenti Donald Tramp ölkənin xarici və iqtisadi siyasəti yenidən formalaşdırır və bu kontekstdə Yunanıstan limanları Çin təsirini azaltmaq üçün prioritet hədəfə çevrilib.
Yunanıstan mətbuatının məlumatına görə, Tramp 2024-cü ilin dekabrında ABŞ-ın Yunanıstandakı səfiri vəzifəsinə namizədliyini irəli sürərkən Kimberli Guilfoyle-a xüsusi tapşırıq verməyi planlaşdırıb. Bu tapşırıq Çin şirkəti COSCO-nun bölgədəki, xüsusən də Pirey limanındakı təsirini zəiflətmək idi.
Yunanıstanın “Kathimerini” qəzeti yazır ki, ABŞ Çinlə iqtisadi və geosiyasi rəqabətdə Saloniki və Dedeağaç limanlarına maraq göstərir. Salonikinin Mərkəzi Avropaya yaxınlığı onu ABŞ-ın dəstəklədiyi Hindistan-Yaxın Şərq-Avropa Dəhlizinin (IMEC) əsas tərkib hissəsinə çevirir.
Qəzet bildirir ki, ABŞ uzun müddətdir Çinin Aralıq dənizindəki mövqeyindən narahatdır və Pirey limanında Çin dövlət şirkəti COSCO-nun pay sahibi olmasını ciddi şəkildə izləyir. Vaşinqton rəsmi Afinadan COSCO-ya təzyiq göstərməsini və Pireydən çəkilməsini tələb edir.
Qeyd edək ki, Yunanıstan hökuməti ABŞ-ın bu tələblərinə müsbət yanaşır. Çin hərbi gəmilərinin Yunan limanlarına giriş tələbləri üç ay əvvəl rədd edilib. Bununla yanaşı, Hindistan da IMEC layihəsi çərçivəsində Dedeağaç limanına maraq göstərir. Yunanıstanın baş naziri Kiriakos Mitsotakis və Hindistanın baş naziri Narendra Modi arasında 2023 və 2024-cü illərdə keçirilmiş görüşlərdə bu layihə gündəmdə olub.
Fransa isə IMEC çərçivəsində Marsel limanı ilə, İtaliya isə üç cənub limanı ilə Hindistanın diqqətini cəlb etməyə çalışır.
