BAKI, AzerVoice

ABŞ prezidenti Donald Tramp Hindistan və Pakistanın “tam və dərhal atəşkəs” barədə razılığa gəldiyini açıqlayıb.

AzerVoice xəbər verir ki, Tramp özünün Truth Social hesabında Hindistan və Pakistan arasında danışıqların ABŞ-ın vasitəçiliyi ilə gecə boyu davam etdiyini açıqlayıb.

“Hindistan və Pakistanın tam və dərhal atəşkəs haqqında razılığa gəldiyini elan etməkdən məmnunam”. Tramp hər iki ölkəni sağlam düşüncələrinə görə təbrik edib.

Pakistanın Xarici İşlər Naziri Dar da Pakistan və Hindistanın atəşkəs haqqında anında razılaşdıqlarını açıqlayıb.

Qeyd edək ki, Hindistan aprelin 22-də Cammu və Kəşmirin Pahalqam rayonunda baş verən və 26 mülki şəxsin ölümü ilə nəticələnən terror aktına görə məsuliyyəti Pakistana yükləyib. Cavab olaraq Hindistan ordusu Pakistan və Azad Kəşmir ərazilərində “terror infrastrukturuna” qarşı raket hücumları həyata keçirib. Pakistan isə hücumların mülki əraziləri hədəf aldığını, nəticədə 31 nəfərin öldüyünü və 57 nəfərin yaralandığını açıqlayıb. Son məlumata görə, qarşılıqlı atəş nəticəsində ümumilikdə 16 nəfər də həyatını itirib.