BAKI, AzerVoice
ABŞ-ın Britaniyanın avtomobillərinə tətbiq edilən gömrük rüsumlarını 27,5 faizdən 10 faizə endirəcək.
AzerVoice xəbər verir ki, bu barədə Böyük Britaniyanın Baş naziri Kir Starmer bildirib.
Starmer qeyd edib ki, əldə edilən ticarət sazişi çərçivəsində ildə 100 min britaniya avtomobili ABŞ-a 10 faizlik rüsumla ixrac ediləcək.
Qeyd edək ki, Vaşinqton və London həmçinin Britaniya istehsalı olan polad və alüminium məhsullarına tətbiq olunan rüsumların tamamilə sıfırlanması barədə də razılığa gəliblər. Yeni gömrük qaydalarının yaxın zamanda qüvvəyə minməsi gözlənilir.
“Bu sazişin əldə olunması çox vacibdir. Bu, mövcud iş yerlərini qorumağa və yenilərini qurmağa imkan verir” - deyə, Starmer bildirib.
O, əlavə edib ki, Britaniyalı fermerlər ABŞ bazarına misilsiz çıxış əldə edəcəklər və bu, ölkənin yüksək keyfiyyət standartlarından güzəştə getmədən baş verəcək.
Starmer vurğulayıb ki, Böyük Britaniya ABŞ ilə iqtisadi əlaqələri genişləndirməklə yanaşı, Avropa İttifaqı (Aİ) ilə də münasibətlərin yenidən qurulmasına çalışacaq. Onun sözlərinə görə, London bu istiqamətdə aktiv işləyir və Vaşinqtonla danışıqlar zamanı bəzi “qırmızı xətlər”i – xüsusilə də Avropa standartlarına uyğun olmayan ABŞ mal və məhsullarının ölkəyə daxil olmasının qarşısını almaq məsələsini qoruyub saxlayıb.
Qeyd edək ki, bu standartlar əsasən Amerika istehsalı olan mal ətinin və toyuq məhsullarının Britaniya bazarına çıxışını məhdudlaşdırır.