BAKI, AzerVoice

Beynəlxalq Əfv Təşkilatı İsraili Qəzzada hərbi əməliyyatları genişləndirməkdən çəkinməyə çağırır.

AzerVoice xəbər verir ki, Beynəlxalq Əfv Təşkilatı İsrail hökumətini Qəzzada hərbi əməliyyatları genişləndirmək, bölgəni işğal etmək və fələstinliləri zorla köçürmək planlarından dərhal imtina etməyə çağırıb.

Təşkilatın yaydığı bəyanatda İsrailin Qəzzada həyata keçirdiyi hərbi əməliyyatların beynəlxalq hüququn pozulması olduğu vurğulanıb. "İsrail hökuməti işğal olunmuş və blokada altındakı Qəzzada hərbi əməliyyatların genişləndirilməsi ilə bağlı elan etdiyi bütün planlardan, o cümlədən fələstinlilərin zorla köçürülməsi və torpaqların ilhaqı planlarından dərhal imtina etməlidir" - deyə bildirilib.

Bəyanatda qeyd olunub ki, Qəzzaya edilən hücumlar bölgədəki fələstinlilərə bərpası mümkün olmayan zərərlər verib və onların yerindən qovulması müharibə cinayəti hesab olunur. Eyni zamanda, mülki şəxslərə qarşı sistematik hücumların insanlığa qarşı cinayət olduğu bildirilib və Qəzzədə məcburi köçkünləşmə hallarının artıq əhalinin 70 faizindən çoxunu əhatə etdiyi qeyd edilib.

Təşkilat Qəzzaya humanitar yardımın İsrail tərəfindən nəzarətdə saxlanılması və seçici şəkildə paylanmasını da tənqid edərək bunun "müstəqil və ayrı-seçkilik etməyən humanitar yardım prinsipinə zidd olduğunu" bəyan edib. Həmçinin bu yanaşma "kollektiv cəza" kimi qiymətləndirilib və beynəlxalq humanitar hüququn pozuntusu olduğu bildirilib.

Beynəlxalq Əfv Təşkilatının direktoru Erikanes Rosas İsrailin son planlarının Qəzzada aylarla sağ qalmaq uğrunda mübarizə aparan əhalini daha da çətin vəziyyətə saldığını vurğulayıb.

Rosas, humanitar yardımdan silah kimi istifadə olunmasının, ayrı-seçkilikli yardım bölgüsünün və məcburi köçkünlərin təminatı vasitəsi kimi təqdim edilməsinin beynəlxalq hüququn açıq şəkildə pozulması olduğunu qeyd edib. O, beynəlxalq ictimaiyyəti bu planları qətiyyətlə rədd etməyə çağıraraq İsrail hökumətini hərbi əməliyyatlara dərhal son verməyə dəvət edib.