BAKI, AzerVoice

Rusiya Hindistan-Pakistan gərginliyindən narahatdır.

AzerVoice xəbər verir ki, Rusiya prezidenti Vladimir Putin Hindistanın baş naziri Narendra Modi ilə telefon danışığı apararaq, Kəşmirdə baş verən terror hücumu ilə bağlı başsağlığı verib.

Telefon danışığında Putin Modiyə başsağlığı verərək, Rusiya-Hindistan münasibətlərinin güclü və davamlı olduğunu vurğulayıb. Modi isə Putini ənənəvi ikitərəfli sammit üçün Hindistana dəvət edib və Rusiya lideri bu dəvəti qəbul edib.

Kremlin sözçüsü Dmitri Peskov isə Rusiya tərəfinin Hindistan və Pakistan arasında artan gərginlikdən narahat olduğunu bildirib.

Peskov Moskvada jurnalistlərə açıqlamasında deyib ki, Hindistan Rusiya üçün strateji tərəfdaş, Pakistan isə müxtəlif sahələrdə mühüm əməkdaşdır. “Sərhədlərdə artan gərginlik bizi ciddi narahat edir. Hər iki ölkə ilə əlaqələrimiz dəyərlidir və biz bu böhranın sülh yolu ilə həll olunacağına ümid edirik”- deyə bildirib.

Qeyd edək ki, aprelin 22-də Hindistanın nəzarətində olan Cammu və Kəşmir bölgəsinin Pahalqam rayonunda turistlərə qarşı həyata keçirilən silahlı hücum nəticəsində 26 nəfər həlak olub. Hadisəyə görə məsuliyyəti Pakistanla əlaqələndirən Hindistan hökuməti İslamabadla diplomatik və iqtisadi münasibətləri kəskin şəkildə məhdudlaşdırıb. Pakistan isə bu iddiaları rədd edib və Hindistanın addımlarını “müharibə aktı” kimi qiymətləndirib.