BAKI, AzerVoice

ABŞ Prezidenti Donald Tramp, Vaşinqtonun Kanadanı hərbi yolla Birləşmiş Ştatlara birləşdirmək niyyətində olduğuna inanmadığını bildirib.

AzerVoice xəbər verir ki, bu barədə Tramp "NBC News" telekanalına verdiyi müsahibədə müvafiq sualı cavablandırıb.

"Düşünürəm ki, biz heç vaxt o nöqtəyə çatmayacağıq. Qrenlandiya ilə bağlı nəsə baş verə bilər. Bu ərazi həm milli, həm də beynəlxalq təhlükəsizlik baxımından bizim üçün vacibdir. Amma düşünürəm ki, məsələnin hərbi güc yolu ilə həlli çox az ehtimal olunur. Kanada ilə isə bu cür ehtimalı heç görmürəm" - deyə, Tramp qeyd edib.

Eyni zamanda Tramp qeyd edib ki, əgər Kanada ABŞ-a daxil olsa, "dəyərli bir ştat" olardı.

"Xəritəyə bu süni xətt (ABŞ-Kanada sərhədi – red.) olmadan baxanda... Çox illər əvvəl cetvərlə çəkilmiş bir xətdir... Təsəvvür edə bilməzsiniz necə möhtəşəm bir ölkə yaranardı" – deyə Tramp əlavə edib.

Tramp daha əvvəl dəfələrlə bildirmişdi ki, Kanadada bir çox insan ölkələrinin ABŞ-ın 51-ci ştatına çevrilməsini dəstəkləyir. Onun fikrincə, belə bir birləşmə Kanadaya iqtisadi sabitlik gətirər və Rusiyadan, Çindən qaynaqlanan təhlükələr də daxil olmaqla, xarici təhdidlərdən qoruyardı.

Kanadanın Baş naziri Mark Karni isə bir neçə dəfə bəyan edib ki, onun ölkəsi heç bir formada ABŞ-ın tərkibinə daxil olmayacaq.