BAKI, AzerVoice

Mərkəzi Kəşfiyyat İdarəsi (CİA) sosial media vasitəsilə Çin casuslarını cəlb etməyə çalışır.

AzerVoice xəbər verir ki, CİA Çin daxilində casus şəbəkəsini yenidən qurmaq məqsədilə ilk dəfə olaraq sosial mediadan istifadə edir. Agentlik bu məqsədlə YouTube, Instagram və Facebook kimi platformalarda Çin dilində iki video yayımlayıb.

Videolarda Çin Kommunist Partiyasının daxili narazılıqlarına toxunulur və potensial informatorlara CİA ilə əlaqə saxlamaq üçün təlimatlar verilir. Bu videolar, daha əvvəl Rusiyaya qarşı həyata keçirilmiş bənzər təşəbbüslərin davamı kimi qiymətləndirilir.

CİA-nin Çin üzrə keçmiş təhlil rəhbəri Dennis Wilder bu cəhdləri “çox nadir və kəşfiyyat sahəsində görünməmiş bir hal” adlandırıb. O bildirib ki, videolar Çin lideri Si Cinpin-in hakimiyyət daxilində apardığı “təmizləmələrdən” yaranan narazılıqlardan istifadə məqsədi daşıyır.

Qeyd edək ki, Çin vətəndaşlarının Qərb sosial media platformalarına çıxışı məhdudlaşdırılsa da, bəzi istifadəçilər VPN-lər vasitəsilə bu bloklamaları aşaraq videolara baxa bilirlər.

CİA-nin bu təşəbbüsü, Çin hakimiyyətinin 2010-cu illərdə ABŞ xeyrinə casusluqda ittiham olunan onlarla vətəndaşı həbs və ya edam etməsindən sonra casus şəbəkəsinin dağılmasının ardından gəlir. Agentlik həmin vaxt informatorlar üçün istifadə olunan gizli rabitə sistemlərinin Çinin əlinə keçməsini qəbul etmişdi.

2023-cü ildə CİA direktoru Bill Burns, Çində casusluq şəbəkəsinin bərpasında “irəliləyiş əldə edildiyini” açıqlamışdı.

Qarşı tərəfdən Çin hökuməti də əks-casusluq tədbirlərini gücləndirib. Dövlət Təhlükəsizliyi Nazirliyi əhalini şübhəli fəaliyyətlər barədə məlumat verməyə çağırıb, WeChat üzərindən təbliğat kampaniyaları aparır və yeni qanunvericiliklə nəzarəti artırır.