BAKI, AzerVoice
Pakistanda yanacaq tankeri partlayışı nəticəsində ölənlər və çox sayda yaralı var.
AzerVoice xəbər verir ki, Pakistanın Bəlucistan əyalətində yanacaq daşıyan tankerin partlaması nəticəsində 2 nəfər həyatını itirib, 56 nəfər isə yaralanıb.
Hadisə Nauşki rayonunda baş verib.
Yerli polis rəsmisi Atta Ullahın sözlərinə görə, əvvəlcə tankerə yanğın düşüb. Hadisə yerinə gələn yanğınsöndürənlərin müdaxiləsi zamanı partlayış baş verib. Nəticədə sürücü və avtomobilin yaxınlığında olan bir nəfər ölüb, yanğınsöndürənlər də daxil olmaqla ümumilikdə 56 nəfər xəsarət alıb.
Qeyd edək ki, daha öncə Pakistanda ən faciəvi yanacaq tankeri partlayışlarından biri 2017-ci ilin iyununda Pəncab əyalətində baş verib. Tanker aşdıqdan sonra ətrafa toplaşan insanlar sızan yanacağı toplamağa çalışıblar. Bu zaman baş verən partlayış nəticəsində 200-dən çox insan həyatını itirmişdi.
