BAKI, AzerVoice
İspaniyada bazar ertəsi günü baş vermiş genişmiqyaslı elektrik kəsintisindən sonra elektrik sisteminin fəaliyyəti normallaşıb.
AzerVoice xəbər verir ki, bu barədə İspaniyanın enerji şəbəkələrini idarə edən Red Electrica şirkəti məlumat verib.
Xatırladaq ki, dünən günorta saatlarında İspaniyada elektrik enerjisi kəsilmişdi. Nəticədə svetoforlar işləməyib, insanlar qatarlarda köməksiz vəziyyətdə qalıb, ictimai nəqliyyat və xəstəxanaların fəaliyyəti pozulub. Eyni zamanda mobil rabitə və internet də işləməyib. Yalnız gecə saatlarında enerji təchizatının tədricən bərpasına başlanılıb.
İspaniya Baş naziri Pedro Sançesin sözlərinə görə, ötən gün təxminən günorta saatlarında sistemdə cəmi beş saniyə ərzində 15 giqavat gücündə enerji itkisi qeydə alınıb. O bildirib ki, hadisənin səbəbi hələ məlum deyil və mütəxəssislər məsələni araşdırırlar.
Qeyd edək ki, baş vermiş nasazlıq Portuqaliyanı da təsirləndirib.
