Bakı,AzerVoice

ABŞ prezidenti Donald Tramp OpenAI, Oracle və SoftBankla birgə “Stargate” adlı müəssisədə ABŞ-ın süni intellekt infrastrukturuna 500 milyard dollarlıq sərmayə yatıracaq.

AzerVoice xəbər verir ki Tramp bu addımı “tarixdəki ən böyük süni intellekt infrastruktur layihəsi” kimi qiymətləndirib və layihənin 100 mindən çox yeni iş yeri yaradacağını bildirib.

Trampın açıqlamasına görə, “Stargate” layihəsi süni intellektin inkişafını dəstəkləyəcək irimiqyaslı məlumat mərkəzləri və digər texnoloji infrastrukturların tikintisini əhatə edir.

Oracle sədri Larri Ellison ilk məlumat mərkəzlərinin Texasda tikildiyini təsdiqləyib və bunun ABŞ iqtisadiyyatı üçün mühüm təsir göstərəcəyini bildirib.

Mətbuat konfransında jurnalistlərin TikTok-un mümkün satışı ilə bağlı sualına da cavab verən Tramp, Elon Mask və Oracle sədri Larri Ellisonun TikTok-u satın almasına açıq olduğunu bildirib. O, TikTok-un ABŞ gəncləri arasında populyarlığını vurğulayaraq, "TikTok mənim üçün xüsusi bir yerdədir, burada gənclərin sevgisini qazandım və bu, seçki qələbəmdə əhəmiyyətli rol oynadı" - deyə bildirib.

Tramp, ABŞ-Meksika-Kanada Müqaviləsi (USMCA) ilə bağlı tarif məsələlərinə toxunaraq, bu mövzunun süni intellekt sərmayələri ilə əlaqəli olmadığını bildirib. Bununla belə, Meksika və Kanadadan gələn fentanil probleminə diqqət çəkərək, Çin mənşəli məhsullara 10 faiz tarif tətbiq etməyi nəzərdən keçirdiklərini açıqlayıb.