BAKI, AzerVoice

Türkiyə-Rusiya əlaqələri enerji baxımından iqtisadiyyatın əsas damarıdır.

AzerVoice xəbər verir ki, Türkiyənin ticarət naziri Ömər Bolat Rusiya ilə iqtisadi və enerji əməkdaşlığının strateji əhəmiyyətini vurğulayıb. Moskvada keçirilən Türkiyə-Rusiya Hökumətlərarası Birgə Komissiyasının (KEK) 19-cu iclasından sonra danışan Bolat, enerji sahəsindəki əməkdaşlığı “iqtisadiyyatın can damarı” adlandırıb.

Nazir bildirib ki, ümumi enerji idxalının 49 faizini Rusiyadan təmin edən Türkiyə üçün bu əlaqələr həyati əhəmiyyət daşıyır. O, Rusiyanın ixracatının 73 faizinin enerji məhsulları olduğunu qeyd edib və “Mavi Axın”, “Türk Axını” boru kəmərləri və Akkuyu AES layihələrinin bu əməkdaşlığın əsas dayaqları olduğunu vurğulayıb.

Bolat qeyd edib ki, Akkuyu Atom Elektrik Stansiyasının ilk bloku yaxın bir il ərzində tamamlanacaq və layihə tam başa çatdıqda Türkiyənin enerji tələbatının 14 faizini qarşılayacaq.

Nazir həmçinin Türk podratçılarının Rusiyada 2200 layihə çərçivəsində 103 milyard dollar dəyərində işlər həyata keçirdiyini və rus turistlərin hər il Türkiyəyə etdiyi təxminən 7 milyonluq səfərin mədəni və turistik əlaqələrin güclü olduğunu göstərdiyini söyləyib.

Qeyd edək ki, görüş zamanı iki ölkə arasında sənaye, ticarət, kənd təsərrüfatı, xidmət sektoru, turizm və nəqliyyat sahələrini əhatə edən yeni Anlaşma Memorandumu da imzalanıb. Bolat vurğulayıb ki, Türkiyə və Rusiya liderlərinin göstərişinə əsasən, ikitərəfli ticarət dövriyyəsinin 100 milyard dollara çatdırılması üçün bütün imkanlar səfərbər olunacaq.