BAKI, AzerVoice, Orxan Qədirzadə

İsrail ordusu Qəzzada müharibə zamanı ölənlərin sayına dair Fələstin Səhiyyə Nazirliyinin açıqladığı rəqəmləri qəbul etmədiyini bildirib.

AzerVoice xəbər verir ki, İsrail ordusunun sözçüsü, polkovnik-leytenant Nadav Şoşani sosial şəbəkədə yaydığı açıqlamada İsrail mediasında dərc olunan məlumatların rəsmi hərbi statistikanı əks etdirmədiyini vurğulayıb.

Şoşani qeyd edib ki, Qəzza müharibəsi ilə bağlı istənilən rəsmi məlumat yalnız səlahiyyətli qurumlar tərəfindən və rəsmi kanallar vasitəsilə açıqlanacaq.

Xatırladaq ki, İsrailin “Haaretz” qəzeti cümə axşamı dərc etdiyi materialda İsrail ordusunun HƏMAS-ın nəzarətində olan Qəzza Səhiyyə Nazirliyinin təqdim etdiyi, 2023-cü ilin oktyabrından bəri 71 minə yaxın fələstinlinin həlak olması ilə bağlı rəqəmləri qəbul etdiyini yazmışdı. Qəzet həmçinin ordunun ölənlər arasında döyüşçülərlə mülki şəxslərin nisbətini müəyyənləşdirmək üçün məlumatları təhlil etdiyini iddia edib.

İsrail rəsmiləri isə bu məlumatları təkzib edərək Qəzza Səhiyyə Nazirliyinin açıqlamalarının etibarlılığına şübhə ilə yanaşdıqlarını bildiriblər. İsrail, ABŞ və Avropa İttifaqı HƏMAS-ı terror təşkilatı kimi tanıyır və İsrail tərəfi HƏMAS-ın nəzarətində olan qurumların verdiyi statistikaya etibar edilməməli olduğunu vurğulayır.

Bununla yanaşı, Birləşmiş Millətlər Təşkilatı Qəzza Səhiyyə Nazirliyinin açıqladığı itki rəqəmlərini ümumilikdə etibarlı hesab edir. Nazirliyin məlumatına görə, həlak olanların yarıdan çoxunu qadınlar və uşaqlar təşkil edir. Statistikaya yalnız İsrail bombardmanları və döyüşlər nəticəsində ölənlər daxildir, dağıntılar altında qalan və ya müharibənin dolayı təsirləri nəticəsində həyatını itirən şəxslər bu siyahıya salınmayıb.

Qeyd edək ki, 7 oktyabr 2023-cü ildə HƏMAS-ın İsrailə hücumu nəticəsində İsrail tərəfdən 1 221 nəfər həlak olub. Bundan sonra başlayan hərbi əməliyyatlar nəticəsində Qəzza zolağında ölənlərin sayı 71 667 nəfəri ötüb.