Bakı,AzerVoice, Orxan Qədirzadə

İsrail ordusu Livanın paytaxtı Beyrutda Hizbullahın qərargah rəisinə qarşı hücum həyata keçirib.

AzerVoice xəbər verir ki, Livan Səhiyyə Nazirliyinin ilkin məlumatlarına əsasən, zərbə nəticəsində bir nəfər həlak olub, 21 nəfər yaralanıb. Həlak olan və yaralanan şəxslərin mülki və ya hərbi olması barədə əlavə məlumat verilməyib.

Hadisə Hizbullahın nəzarətində olan sıx yaşayış massivində qeydə alınıb. Livanın rəsmi Milli Xəbər Agentliyi bildirib ki, binaya üç raket atılıb və yaxınlıqdakı binalar ilə nəqliyyat vasitələrinə ciddi ziyan dəyib.

İsrail Baş naziri Benyamin Netanyahu bəyan edib ki, hava zərbəsi onun göstərişi ilə həyata keçirilib.

“Bu gün Beyrutun mərkəzində təşkilatın silahlanmasını və qüvvələrin artırılmasını idarə edən Hizbullahın qərargah rəisi hədəf alınıb. İsrail məqsədlərinə çatmaq üçün hər yerdə və hər zaman fəaliyyət göstərəcək.”-o, deyib.

İsrail son bir il ərzində Livana demək olar ki, hər gün zərbə endirib. Hücumlar əsasən ölkənin cənub və şərq bölgələrində Hizbullah üzvlərinə yönəlib. Bu, 5 iyundan sonra Beyrutun cənub rayonlarına endirilən ilk hava zərbəsidir.

Günün əvvəlində Livanın cənubundakı Aita əl-Şaab qəsəbəsinə edilən hücumda bir nəfərin öldüyü bildirilmişdi.

Hizbullah 2023-cü ilin oktyabrında Qəzzada müharibə başlayandan sonra İsrailə qarşı hərbi əməliyyatlara qoşulub, qarşıdurmalar daha sonra genişmiqyaslı müharibəyə çevrilib.

ABŞ və İsrail son aylarda Livan hökumətinə təşkilatın silahsızlaşdırılması üçün təzyiqləri artırıb. Hizbullah isə bu çağırışları rədd edir.

Netanyahu son açıqlamasında bildirib ki, İsrail “Hizbullahın Livanda yenidən güclənməsinin qarşısını almaq üçün lazım olan bütün tədbirləri görəcək”.