BAKI, AzerVoice, Səməd Əyyubov
İranın İsraillə müharibəsi hələ bitməyib.
AzerVoice xəbər verir ki, bu fikirləri İran Ali Milli Təhlükəsizlik Şurasının katibi Əli Laricani səsləndirib.
“Bu müharibə yalnız atəşkəs xəttində dayandırılıb. Anlamalıyıq ki, müharibə başa çatmayıb. Biz daim hazır olmalı, birliyimizi və həmrəyliyimizi qorumağa məcburuq”, – deyə Laricani bildirib.
Onun sözlərinə görə, şura ölkənin müdafiə sistemindəki boşluqları aradan qaldırmaq və hərbi fəaliyyətləri koordinasiya etmək məqsədilə Müdafiə Şurası yaradıb.
“Baş Qərargah öz vəzifələrini icra edir, Müdafiə Nazirliyi tələbatı qarşılayır, İnqilab Keşikçiləri (SEPAH - red.) isə xüsusilə aerokosmik sahədə bu çərçivədə fəaliyyət göstərir”, – o əlavə edib.
Laricani vurğulayıb ki, şura radar və hava hücumundan müdafiə sistemlərindəki zəiflikləri aradan qaldırmaq üçün daxili imkanların gücləndirilməsi üzərində işləyir. O bildirib ki, yeni texnika alınmağa davam etsə də, əsas diqqət istehsalda özünütəminata yönəldilib. Zəruri hallarda isə xarici tərəfdaşlıqlardan istifadə edilir.
O, həmçinin qeyd edib ki, İraq və Livandakı müqavimət qrupları ağır təzyiqlərə və döyüşlərə baxmayaraq fəaliyyətlərini davam etdirirlər. Laricani əlavə edib ki, Tehran bu qrupları birbaşa idarə etmir.
Bununla belə, o, Hizbullaha dəstək göstərdiklərini açıq şəkildə etiraf edib:
“Bəli, biz onlara yardım etmişik, bunu gizlətmirik və etməyə də davam edəcəyik. Amma Hizbullahı livanlılar özləri yaratdılar. İraqda da ABŞ işğalından sonra müqavimət hərəkatları meydana çıxdı.”
Nüvə danışıqlarına da toxunan Laricani bildirib ki, İran diplomatiyadan imtina etməməlidir, lakin bu danışıqlar “sadəcə nümayiş xarakteri daşımamalı, real və strateji mahiyyət kəsb etməlidir.”
O, “sanksiyaların bərpası” mexanizminin etibarlılığına şübhə ilə yanaşaraq qeyd edib ki, onun şərtləri qeyri-müəyyən və ziddiyyətlidir:
“ABŞ sazişdən çıxdıqdan sonra bu mexanizmin hüquqi əsası sual altına düşüb və Avropanı hüquqi paradoksa salıb.”
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək rütbəli hərbçi, o cümlədən İran Silahlı Qüvvələrinin Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər həlak olub. İran BMT Təhlükəsizlik Şurasının hadisə ilə əlaqədar fövqəladə iclas çağırılmasını istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.