BAKI.AzerVoice
İsrail ordusunun hücumlar həyata keçirdiyi Qəzza zolağında daha bir körpə aclıqdan ölüb.
AzerVoice xəbər verir ki, bu barədə Fələstin xəbər agentliyi WAFA-nın məlumat yayıb.
Qəzza şəhərindəki Şifa xəstəxanasında Məhəmməd İbrahim Ades adlı 7 aylıq körpə şiddətli aclıq və uşaq qidası çatışmazlığı səbəbindən həyatını itirib. Qəzzada son 24 saatda ikisi uşaq olmaqla 6 fələstinli aclıqdan ölüb.
İsrailin hücumları və humanitar yardımların ölkəyə girişini məhdudlaşdıran sıx blokadası nəticəsində Qəzza zolağında aclıqdan ölənlərin sayı 88-i uşaq olmaqla azı 134-ə yüksəlib.
Qeyd edək ki, BMT baş katibinin humanitar məsələlər üzrə müavini və fövqəladə yardım koordinatoru Tom Fletcher Qəzzada hər üç nəfərdən birinin günlərdir yemək yemədiyini bildirərək, humanitar yardımların sürətlə çatdırılması və daimi atəşkəsin yaradılmasını istəyib.
İsrailin hücumu və humanitar yardımların daxil olmasını məhdudlaşdıran sıx mühasirə altında olan Qəzza zolağı geniş aclıq və su, dərman, tibbi ləvazimat və gigiyena materiallarının çatışmazlığı ilə humanitar fəlakət yaşayır. Qəzza zolağında aclıqdan, xüsusən də uşaqlar arasında ölüm halları artır.Yerli və beynəlxalq dairələr İsrailin “aclıq və susuzluqdan silah kimi” istifadə etdiyini bildirir.
Əsas ləvazimatlardan məhrum olan məcburi köçkün fələstinlilər müvəqqəti çadırlarda və ya gigiyena ləvazimatlarının az olduğu, lavaboların qeyri-kafi olduğu və yoluxucu xəstəliklərin tüğyan etdiyi həddən artıq izdihamlı məktəblərdə sağ qalmaq üçün mübarizə aparır.
İsrail ordusu isə gündəlik hücumlarla köçkünlərin çadırlarını və mülki sığınacaqlarını bombalayır.
2023-cü il oktyabrın 7-dən bəri İsrailin Qəzza zolağına hücumları nəticəsində ən azı 59 821 fələstinli ölüb, 144 851 nəfər yaralanıb.
